VIQUEQUE, 06 fevereiru 2025 (TATOLI)—Xefe suku Laline, postu Lacluta, munisípiu Viqueque, Zaquel de Carbalho, informa Estrada ba suku Laline aat fó impaktu ba folin foos sa’e makaas tanba negosiante sira faan foos kilógrama 25 kada saka ida $25.
“Kauza folin foos sa’e tanba kondisaun estrada ne’ebé liga mai ami-nia suku iha tempu udan ne’e karreta labele asesu mai to’o iha ne’e. Nune’e, ita-nia negosiante hosi suku Laline mak lori kuda ba Cribas, munisípiu Manatato no Cairui mak sosa foos mai faan fali iha Laline. Entaun sira faan tutan ne’e, foos kilógrama 25 ne’e kafa saka ida folin $25 no kilógrama 20 ne’e kada saka ida folin $20. Komunidade pasiénsia sosa hodi konsumu,” Zaquel de Carbalho hateten ba Agência Tatoli, iha postu Lacluta, kinta ne’e.
Autoridade lokál ne’e hatetem, kada tinan iha tempu udan ne’e folin foos sempre sa’e tanba negosiante sira ba sosa dook, hafoin faan fila-fali ba komunidade tanba ne’e sira tenke hasa’e folin foos.
“Ha’u sente folin foos sai difikuldade ba ita-nia komunidade tanba sira-nia ekonomia no renfimentu kiik, maibé sira ho pasiénsia sosa. Dalan ne’ebé aat fó impaktu ba sasán nesesidade bázika moa folin karun hodi prejudika ba ita-nia povu kiik sira,” nia hateten.
Kona-ba kondisaun estrada ne’ebé aat, nia parte kada tinan hato’o bei-beik ba Governu liuhusi Ministériu Obra Públik (MOP) atu hadi’a estrada liga ba suku Laline, maibé to’o agora seidauk iha resposta ruma.
“Estrada ba ami-nia suku ne’e hato’o beibeik no tékniku husi obra públika mós ba sukat ona, maibé seidauk halo reabilitasaun ruma hodi fasilita ita-nia komunidade. Hanesan daudaun folin foos sa’e tanba kauza husi estrada. Nune’e, ha’u husu ba Governu hadi’a ona estrada liga ba suku Laline atu labele difikulta ba komunidade nia moris,” nia dehan.
Estrada liga ba suku rua ne’e maiória rai komunidade no tenke hakur mota We Aas, We Leu, We Dora, Derok Oan, mota Kao no mota hirak ne’e seidauk konstrui ponte, nune’e sai risku ba komunidade tanba distánsia husi postu Lacluta Vila ba suku Ahic no Laline ne’e, kuaze kilómetru 17.
Tuir dadus, populasaun suku Laline iha aldeia lima (5) ne’ebé kompostu husi Aimeti-Hun, Fatu-Kedo, Mau-Ama, Mikradek no Santo António, ne’ebé ho total populasaun tuir sensu 2015 ne’e hamutuk 943.
Enkuantu, dadús populasaun suku Ahic kompostu husi aldeia lima (5) mak aldeia Crarec Boco ho totál uma kain 42, Hali-oan ho totál uma kain 36, Ailooc iha uma kain 57, Halimean iha 97, Cai-ua iha 72, nunee totál uma kain iha suku hamutuk 304 no totál populasaun hamutuk 2.004.
Hatan ba Estrada aat iha Lacluta ne’e, Diretór Obra Publika (MOP) munisipiu Viqueque, Casildo Gomes, haktuir kondisaun estrada rurál ne’ebé aat ne’e parte Obra Públika Viqueque rekolla ona dadus no aprezenta ona ba nasionál.
“Dadús estrada rurál iha postu Lacluta ami rekolla ona dadus no ami aprezenta ona ba nasionál hodi haree, maibé agora rezultadu seidauk sai ne’ebé ita hein prosesu,” nia dehan.
Jornalista : Vitorino Lopes da Costa
Editór : Cancio Ximenes
