DILI, 05 fevereiru 2025 (TATOLI)—Daikyo Industrial Gas and Equipment (DIG) husi Filipina, kada fulan fornese silindru oksijéniu hamutuk 4.000 hodi apoia Hospital Nacional Guido Valadares (HNGV).
Jestór DIG, Rosell G. NaJe hateten empreza eziste ona durante tinan 23 iha Timor -Leste servisu hamutuk ho HNGV atu ajuda pasiente sira ne’ebé moras.
Nia haktuir, fornesimentu botir gás ne’e la’ós ba de’it HNGV, maibé fornese mós ba ofisina sira iha Dili no mós empreza soldadura sira iha Dili laran.
“Ami-nia funsionáriu hamutuk 15 kompostu husi timoroan na’in 12 no Filipina na’in tolu halo ona operasaun kuaze tinan 23. Durante ne’e ami enfrenta difikuldade sira hanesan aluga rai tanba rai karun, folin $4.000/bulan. Tanba ne’e mak ami rekomenda ba Governu Timor-Leste atu fornese rai balun nune’e ami bele kontinua ami-nia investimentu iha Timor -Leste,” NaJe hateten ba TATOLI iha ninia eskritóriu, Fomento, tersa (04/02/2025).
NaJe fó hanoin katak iha futuru kuandu iha ona zona indústria, sei muda bá fatin saudável ho objetivu atu asegura saúde públika hodi kontinua atividade indústria iha Timor -Leste para kria tan oportunidade servisu iha diversifikasaun ekonomia.
Silindru gás serve atu konserva gás médiku iha alta tensaun. Silindru ida-ne’e konstruidu husi matéria ne’ebé rezile ba presaun no livre uza hodi konserva gás médiku.
Jornalista: Felicidade Ximenes
Editór: Xisto Freitas da Piedade
