DILI, 06 Fevereiru 2025 (TATOLI) – Kafé Atsabe iha Fomentu II ne’ebé hetan despezu administrativu, iha loron 03 janeiru 2025, husi Sekretaria Estadu Asuntu Toponímia no Organizasaun Urbana (SEATOU), loke fali ona, horisehik, nia atividade negósiu ba públiku.
Na’in ba Kafé Atsabe, Mariano ‘Ameta’ da Costa, hateten bainhira nia kafetaria hetan despezu administrativu ne’e hamosu dezafiu boot ida ba nia, maibé tanba hakarak kontribui ba nasaun, entaun tenke esforsu hodi loke filafali, nune’e fó empregu ba nia traballadór sira.
Fatin foun ba kafetaria ne’e loke nafatin iha Fomentu II, maibé muda fali de’it ba estrada sorin iha diresaun ponte III iha liman karuk.
“Ha’u hakarak loke filafali Kafé Atsabe Fomentu II ne’e, tanba mosu ho istória ida katak ha’u harii kafetaria ne’e husi baku rai-henek iha mota Komoro laran. Nune’e, bainhira hetan despezu administrativu ha’u hahú hanoin ona katak tenke buka dalan loke fali”, Ameta’da Costa dehan ba Tatoli, iha Fomentu II-Komoro, ohin.
Nia esplika katak bainhira nia parte hetan despezu administrativu, iha ona hanoin bele halo aprosimasaun ho Governu hodi fó espasu públiku ruma ba nia loke nia kaferatia foun. “Fatin ne’ebé daudaun ha’u loke fali ne’e esforsu mesak no fatin apoiu husi Governu ne’e iha, maibé daudaun iha hela faze reabilitasaun nian, ne’ebé bainhira ramata mak ha’u fo hatene ba públiku”, nia adianta.
Tuir nia, moris ne’e sempre iha dezafiu, maibé labele rende ho dezafiu ne’ebé iha no esforsu aan nafatin buka dalan, tanba sempre iha solusaun, tanba nia iha vontade ba dezenvolvimentu kafé nian.
Nia afirma katak impaktu husi despeju administrativu ba kafé Atsabe mak traballadór sira labele serbisu hanesan baibain, maibé nia parte esforsu lori traballadór sira ne’e ba ajuda kafetaria Atsabe seluk iha Hudi-Laran no Palapasu ho oras balun de’it, nune’e sira iha nafatin serbisu.
“Daudaun loke fali ona Kafé Atsabe Fomentu II, traballadór sira mós hahú serbisu normál. Sira ne’e besik 20”, nia informa.
Notísia relevante: MKI apresia Kafé Atsabe sai modelu ba joven emprendedorizmu
Produtu ne’ebé kafétaria Atsabe ne’e iha kuaze sosa husi agrikultór sira husi Atsabe no Letefoho, husi munisípiu Ermera.
“Maske ha’u hasoru difikuldade, maibé haree ba agrikultór kafé sira esforsu, kontinua kuda kafé maka motiva ha’u buka solusaun hodi sosa sira-nia produtu”, realsa.
Despeju administrativu ne’ebé Kafé Atsabe hetan ne’e kuaze lakon kustu ein jerál rihun $52-resin. “Ha’u-nia mensajen ba joven sira, esforsu aan nafatin, mehi saida mak ita hakarak realiza ne’e halo de’it, tanba moris ne’e sempre hasoru dezafiu, maibé konsidera hanesan belun ida nune’e motiva ita hakat ba oin”, nia hato’o.
FOTO ATUÁL: Hafoin afeta despezu administrativu, Kafe Atsabe loke fali ona fatin foun
Jornalista: Arminda Fonseca
Editora: Maria Auxiliadora
