VIQUEQUE, 06 fevereiru 2025 (TATOLI)—Polísia Nasionál Timor Leste (PNTL) munisípiu Viqueque, kinta ne’e, detein ona suspeitu ba kazu danu ne’ebé tenta atu estraga sasán iha kuartél PNTL munisípiu Viqueque.
Komandante Polísia Nasionál Timor Leste (PNTL) munisípiu Viqueque, superintendente António Rego Fernandes, hatete kuartél PNTL ne’e ema hotu-hotu respeita maibé nia tama derrepente, depois atu sunu tán sasán sira-ne’e entaun ida-ne’e nia intensaun saida, tanba ne’e mak membru PNTL sira halai tuir hodi halo atuasaun no detein nia.
“Ohin, ami prosesu hotu ona no kazu ida-ne’e ita rejista ho tipu kazu danu. Daudaun ne’e, detein hela iha PNTL Viqueque Vila,” Komandante PNTL munisípiu Viqueque ne’e hateten ba Agência Tatoli iha kuartél PNTL, Base Camp, kinta ne’e.
Daudaun ne’e, nia dehan, joven ho inisiál LG ne’e PNTL Viqueque asegura ona iha sala detensaun PNTL eskuadra Viqueque Vila no membru PNTL la’ós baku joven ne’e maibé halo atuasaun ba ninia aktu tanba kazu ne’e grave.
Nia haktuir, tuir kronolojia akontesementu ohin (kinta, 06 janeiru) ne’e akontese iha tuku 13h00 meudia, membru PNTL sira hotu ba han meudia nian, joven ida ho inisiál LG ne’e ho motorizada Mega Pro kór mean ho xapa matrikula 8470 D halai ba-mai husi Buanurak no Viqueque Vila la taka kapasete.
Derrepente nia halai tama ba kuartél PNTL Viqueque nia laran, iha parte kotuk ne’ebé evidénsia sira hanesan karreta no motorizada para ba ne’e. Joven ne’e lori gas joven ne’e lori gas (iskeru) no tudik ida atu sunu kamioneta ida mak membru polísia hasee no nia halai ba Buanurak to’o natar laran mak membru PNTL sira kaptura no halo atuasaun.
Antes atu sunu karreta ne’e, suspeitu lori motorizada halai tama no gas halimar iha kuartél komandu PNTL munisípiu nia laran.
Entretantu, suspeitu ne’e atuál funsionáriu ne’ebé daudaun ne’e hakna’ar-aan iha servisu agrikultura munisípiu Viqueque, nia husi suku Matahoi, postu administrativu Uatulari, munisípiu Viqueque.
Jornalista : Vitorino Lopes da Costa
Editór : Cancio Ximenes
