COVALIMA, 06 fevereiru 2025 (TATOLI) – Hahú Janeiru to’o Dezembru 2024, Servisu Munisipál Rejistu Notariadu no Kadastrál rejista ona sidadaun na’in-5,135 mak trata ona sira-nia dokumentu Sertidaun moris no sertidaun óbitu.
Diretór Servisu Munisipál Rejistu Notáriadu no Servisu Kadastrál Covalima, António Sarmento, dehan, Servisu Rejistu Notáriadu no Kadastrál iha nia Programa asesu ba justisa ho nia sub-programa Rejistu Notariadu no Rejistu Kadastrál
“Sub-programa Rejistu Notariadu ami hala’o atividade ne’e mak hanesan simu dokumentu halo rejistu no enkamiña ba komunidade trata dokumentu sertidaun nasimentu no sertidaun óbitu”, António Sarmento, informa ba jornalista TATOLI iha Bairru Rompe, ohin.
Ho nune’e iha 2024 konsege atende sidadaun ne’ebé mak trata dokumentu sertidaun moris no sertidaun óbitu hamutuk 5,135. Husi númeru ne’e sertidaun moris 4909 no sertidaun óbitu 226.
Servisu Munisipál Rejistu Notariadu no Kadastrál hala’o atividade sosializasaun informasaun iha nível postu kona-ba importánsia dokumentu rejistu notariadu tanba komunidade barak mak presiza trata dokumentu.
“Sub-programa kadastru ami hala’o atividade hodi halo identifikasaun rai no uma Estadu iha baze.konaba atividade identifiksaun iha 2024 hala’o identifikasaun no halo levantamentu Kadasterál no regulariza rai hamutuk 233”, nia hatete.
Prosesu identifika funsionáriu Kadasterál sira hala’o iha postu Administrativu Tilomar iha área transmigrasaun no iha postu Suai iha Suku Camenasa, Debos no Suai loro. “Komunidade sira okupa proprietária Estadu ita hatene katak iha momentu ne’e transmigrasaun sidadaun Indonézia no timoroan balun mak okupa maibé ida-ne’e nafatin proprietária Estadu, tanba ne’e mak servisu rejistu Kadasterál halo identifikasaun hanesan komunidade iha Suku Debos propriedade Estadu maibé balun empreza mak okupa hodi selu arrendamentu”, nia esplika.
Servisu Munisipál Rejistu Notáriadu no Servisu Kadasterál halo identifikasaun rai no uma Estadu ho nia objetivu mak atu hatene totál rai no uma Estadu ne’ebé komunidade no empreza sira okupa iha munisípiu Covalima.
Hafoin halo levantementu hodi halo rejistu no sei haruka ba Prezidente Autoridade Munisípiu Covalima no Terra no Propriedade Covalima atu halo arrendamentu.
Orsamentu Jerál Estadu 2024 ne’ebé aloka ba Rejistu Notáriadu no Kadasterál $ 71,701 no orsamentu ba 2025 ne’e aloka tan $ 56991 hodi finansia progama asesu justisa no nia sub-programa rejistu notariadu no rejistu kadasterál.
Jornalista:Celestina Teles
Editór :Rafael Ximenes de A Belo
