COVALIMA, 06 fevereiru 2025 (TATOLI) – Sekretariadu Tékniku Administrasaun Eleitorál (STAE), Covalima, prodús ona kartaun eleitorál biométriku ba sidadaun hamutuk 2,672, iha Covalima.
“Ita-nia sistema biométriku hahú abertura iha loron 29 outubru to’o dezembru 2024 sidadaun ne’ebé atualiza kartaun eleitorál biométriku no hasai foun hamutuk 2,672”, Diretór STAE Covalima, Francisco Gusmão relata dadus ne’e ba TATOLI iha Kampung-Baru, ohin.
Sidadaun hamutuk 2,672 kompostu husi sidadaun ne’ebé mak atualiza kartaun eleitorál 2,478. Husi númeru ne’e, mane 1,234 no feto 1,244.
Sidadaun ne’ebé nia idade to’o ona 17 hasai ona kartaun eleitorál foin hamutuk 194 kompostu husi mane 84 no feto 110.
Dirijente ne’e esplika katak dadaun-ne’e STAE Covalima menus rekursu umanu tanba provizóriu funsionáriu kontratadu atu ajuda servisu atendementu seidauk servisu nune’e funsionáriu permente mak prense hodi halo atendementu.
“Dadaun-ne’e ami menus rekursu umanu atu atende sidadaun sira ne’ebé mak atu trata sira-nia kartaun Eleitorál biométriku iha STAE Covalima,” nia dehan.
Tuir dadus funsionáriu permanente daudaun ne’ebé presta servisu iha STAE Covalima hamutuk na’in lima kompostu husi funsionáriu na’in haat no diretór STAE.
“Atu aumenta funsionáriu atu ajuda hala’o servisu STEA ida-ne’e depende ami-nia superiór sira atu koloka, tanba ami presiza funsionáriu apoiu administrasaun, motorista no mós cleaner (pesoál limpeza) maibé depende mós planu OJE 2025,” Diretór STAE rekomenda.
Jornalista:Celestina Teles.
Editór :Rafael Ximenes de A Belo
