DILI, 06 fevereiru 2025 (TATOLI)—Diretora Jerál Unidade Jestaun Projetu iha Ministériu Saúde (MS), Adelia Barreto, hateten Ministériu Saúde planu iha tinan ne’e atu harii sentru saúde neen, reabilita postu saúde iha postu administrativu inklui harii rezidénsia profisionál saúde.
“Ita iha orsamentu millaun $6.9 husi Konsellu Administrasaun Fundu Infraestrutura (KAFI) ba konstrusaun referida,” Adelia Barreto informa ba TATOLI iha nia kna’ar fatin, kinta ne’e
Diretór ne’e dehan planu konstrusaun infraestrutura saúde sei garante mós inkluzividade ba ema ho defisiénsia sira.
Nia relata, konstrusaun ne’e sei halo iha munisípiu sira hanesan Aileu, Ainaro, Bobonaro, Baucau, Covalima, Dili, Ermera, Lautém, Liquiçá no munisípiu sira seluk.
Entretantu, Diretora Jerál Unidade Jestaun Projetu iha Ministériu Saúde hateten katak Ministériu Saúde mós iha planu atu harii ospitál referénsia rua iha munisípiu Ermera no Manufahi, tinan ne’e.
“Iha tinan 2025, MS iha ona planu atu harii ospitál rua iha munisípiu Manufahi no Ermera,” Adelia tenik.
Diretora ne’e hatutan, prosesu konstrusaun ba ospital sira-ne’e komplikadu tebes tanba projetu ne’e boot liu, maibé nia garante katak tinan ne’e sei hala’o.
“Prosesu ne’e iha hela estudu nia laran. Konsulta detallu dezeñu enjeñaria, rekolla dadus no konfirmasaun husi Ajénsia Dezenvolvimentu Nasionál, molok halo konkursu públiku,” nia esklarese.
Jornalista: Felicidade Ximenes
Editór: Xisto Freitas da Piedade
