DILI, 06 fevereiru 2025 (TATOLI)—Diretór Servisu Nasionál Ambulánsia Emerjénsia Médika, Institutu Públiku (SNAEM, I.P), Simplício Amaral de Deus, hateten iha tinan ne’e SNAEM sei hola tan ambulánsia lima iha Tailándia.
“Iha tinan 2025 ita sei kompra tan ambulánsia lima husi Tailándia ne’ebé uza Orsamentu Jerál Estadu hamutuk rihun $300,” Simplício informa ba TATOLI iha nia kna’ar fatin, kinta ne’e.
Nia dehan, ambulánsia ne’ebé atu sosa ba tinan ne’e lahanesan ho ambulánsia ne’ebé mak kompra iha 2024.
“Ambulánsia lima ne’e, rua ita uza ba pediatria no inan isin-rua ne’ebé mak mai ho nia ekipamentu kompletu, ida seluk uza ba VIP sira ne’ebé mak ho nia modelu oin-seluk no rua seluk mak hanesan ambulánsia babain tula ema adultu sira ne’ebé mak moras,” nia dehan.
Nia haktuir SNAEM sei loke konkursu públiku nune’e empreza nasionál no internasionál bele aplika nune’e sira ne’ebé mak liu, sira bele sosa ambulánsia ne’e rasik.
“Normalmente, kompra iha nasaun Tailándia, maibé depende ba empreza ne’ebé mak manán nune’e sira bele sosa,” nia relata.
Husi ambulánsia lima ne’e, rua distribui bá munisípiu Ainaro no Viqueque, rua utiliza iha nasionál hodi atende labarik sira no ida seluk ba VIP sira.
Jornalista: Felicidade Ximenes
Editór: Xisto Freitas da Piedade
