DILI, 05 fevereiru 2025 (TATOLI)—Espesialista NefroloJia no atuál Xefe Departamentu Medisina Interna iha Hospital Nacional Guido Valadares (HNGV), Gustavo do Rosário da Cruz, informa Eis Sekretáriu Estadu Asuntu Veteranu, Júlio da Conceição “Loro Mesak” baixa iha HNGV tanba enfrenta moras rins.
“Iha momentu halo tratamentu iha rai-li’ur ne’ebá hatudu ona katak iha ona problema rins, produtu husi tensaun ne’e rasik. Entaun, iha rai-li’ur sira mós ko’alia uitoan kona-ba dezenvolvimentu moras gagal ginjal ne’e,” Gustavo do Rosário da Cruz, informa ba jornalista sira iha HNGV, Bidau, kuarta ne’e.
Nia afirma, iha fulan dezembru tinan kotuk bainhira veteranu ne’e mai baixa, husi parte kardiolojia sira bolu espesialista neufrolojia bá haree iha-ne’ebá hatudu evidénsia katak veteranu ne’e iha ona problema rins no hatudu katak moras ne’e la’ós foin akontese maibé moras ne’e kle’ur tiha ona.
“Moras rins halai ona bá nia isin-lolon, tanba ne’e mak hamosu ona ain-bubu no pulmaun. Nune’e, tenke hasai fluidu (cairan) mak liuhusi mákina fase ran, tanba mákina fase ran ne’e bele hasai fluidu. Tanba ne’e mak horisehik no segunda ami ko’alia ona ho veteranu ne’e, nia mós aseita. Horisehik komesa halo tratamentu iha fase ran ba dala rua ona,” nia informa.
Gustavo haktuir, Eis Sekretáriu Estadu Asuntu Veteranu daudaun ne’e kondisaun di’ak filafali ona no lahanesan uluk hafoin halo tratamentu iha neufrolojia no hasai fluidu.
“Ohin ha’u konversa ho ita-nia veteranu ne’e dehan sente kamaan ona, entaun aban (06/02) halo tan sesaun ida iha parte neufrolojia bele alta. Ita bele halo programa tuir oráriu ne’ebé mak estabelese ona, no iha parte fuan bele alta depois mak halo ambulantoriamente,” nia hato’o.
Iha fatin hanesan, eis Sekretáriu Estadu Loro Mesak klarifika katak moras kolestról ne’e nia halo tratamentu iha Malázia ba dala tolu ona, maibé tenke filafali mai halo tratamentu iha Hospital Nacional Guido Valadares hodi fase ran.
“Ha’u hasoru moras kolestról kle’ur ona. Bainhira ha’u sei Sekretáriu Estadu ha’u bá Malázia dala tolu ona no dala ikus mak fase ran. Ha’u mai primeiru iha Hospital Nacional Guido Valadares iha fulan ne’e molok ami-nia mandatu hotu. Foin daudaun iha 02 fevereiru ha’u mai tan ba dala rua,” nia haktuir.
Veteranu reforsa, sofre moras rins ne’e la’ós maihusi jerasaun, maibé maihusi hahán ne’ebé mak loron-loron konsumu tanba hahán sira-ne’e uza matéria kímika (formalin). Tanba ne’e, bá-oin tenke redús buat ne’ebé mak konjeladu ona maihusi li’ur no tenke konsumu hahán lokál.
Jornalista: Felicidade Ximenes
Editór: Xisto Freitas da Piedade
