KOVALIMA, 07 fevereiru 2025 (TATOLI) –Ai monu hanehan uma ida Aldeia Tabakolot, Suku Debos, Postu administrativu Suai, Munisípiu Kovalima, horseik, kauza husi anin.
Maske la rezulta vítima ruma maibé Komunidade Madalena da Silva Oliveira, hanesan uma-na’in, lamenta ho servisu atendimentu husi Autoridade Protesaun Sívil (APC-sigla Portugés), tanba antes ne’e hato’o ona pedidu hodi husu ajuda atu tesi ai ne’e maibé la tesi to’o ai ne’ebé atu tesi monu hanehan uma referida.
“Molok ai atu monu, ami submete ona pedidu hodi husu ajuda ba Autoridade Protesaun Sívil atu tesi ai, tanba ami hatene ai ne’e risku ba ami maibé sira la tesi horseik lorokoraik ai monu hanehan uma, halo kalen kle’uk hotu, sira foin mai tesi ai tanba ne’e ami lamenta”, Komunidade, Madalena da Silva Oliveira informa ba TATOLI, iha Tabakolot, ohin.
Madalena esplika katak durante ne’e submete pedidu hodi husu ajuda ba APC da-haat hanesan iha loron 26 janeiru no loron abríl 2023 no iha loron 3-dezembru 2024 maibé la responde.
Maske nune’e, nia parte nafatin hato’o agradesimentu tanba hafoin akontesimentu ai monu hanehan uma, ekipa husi bombeiru no APC tuun ba terenu tesi ai hodi fasilita movimentu transporte públiku.
“Tuir loloos ami na’in mak atu tesi maibé tesi presiza fó indemnizasaun ba empreza Telemor no Telkomcel bainhira tesi ai mak fiu kotu,” nia dehan.
Tan ne’e, nia rekomenda, ba futuru labele akontese situasaun bainhira komunidade sira hato’o pedidu husu ajuda atu tesi presiza atu responde nune’e labele fó impaktu ba ema nia vida, la’ós ai hanehan ema nia uma tiha foin mai tesi ai.
APC rekoñese
Ho lamentasaun ne’e, Komandante Operasaun APC Covalima Celestino Afonso reķoñese, komunidade husi Tabakolot submete karta iha momentu komandante APC sesante nia tempu hodi hatuun kedas despaixu.
“Hafoin hatuun tiha despaixu hodi tuun ba terrenu iha momentu ne’e la tesi ai tanba ita-nia difikuldade iha fiu eletrisidade, Timor Telecom no Telemor, nune’e la konsege tesi ai,” nia klarifika.
Molok ne’e esperiénsia hatudu katak bainhira tesi ai Telemor nia fiu kotu, diretór Telemor ba kedas Bombeiru Nasionál atu selu hodi husu osan rihun lima-resin tan ne’e hein malu.
“Iha ha’u-nia tempu sira hato’o de’it ho verbal maibé la submete karta pedidu hodi husu atu tesi ai” esplika.
Bazeia ba regra APC labele fó apoiu material rekuperasaun tanba ai hanehan uma liga ho fatin negósiu entaun oinsá mak bele foti imajen. Bazeia ba regra fatin hanesan loja, kioske, uma-lisan no koziña labele fó apoiu materiál rekuperasaun.
Jornalista:Celestina Teles
Editór: Rafael Ximenes de A. Belo
