DILI, 07 fevereiru 2025 (TATOLI)—Ministériu Obra Públika hala’o enkontru ho Kámara Komérsiu no Indústria Timor-Leste (CCI- TL, sigla portugés), hodi diskute identifikasaun setór privadu nasionál.
“Ami ohin enkontru ho CCI-TL oinsá Governu bele serbisu hamutuk atu kapasita setór privadu bá iha futuru, tanba setór privadu mak parseiru importante ba Governu,” Ministru Obra Púbika, Samuel Marçal informa ba jornalista sira bainhira ramata enkontru ho CCI-TL no setór privadu nasionál, kona-ba rejime jurídiku sertifikasaun no inskrisaun ba empreza konstrusaun sivíl ho konsultória téknika sivíl, iha salaun CCI-TL, Akait, Dili, sesta ne’e.
Nia dehan, Governu halo planu tau osan ba konstrusaun sivíl sira, maibé ezekutór ne’e maihusi setór privadu sira.
“Ohin ha’u mai atu organiza filafali setór privadu sira liuhusi CCI-TL,tanba empreza unipessoal hetan kontrolu husi CCI-TL. Entaun, ida-ne’e mak ohin ita enkontru ho CCI-TL nune’e semana rua bá-oin atu hala’o enkontru mós ho empreza sira hotu, oinsá ita buka took parte Governu nian saida mak atu suporta sira hodi dudu ita-nia setór privadu sira bele la’o bá-oin,” nia hateten.
Nia esplika, ohin ne’e Governu ho CCI-TL organiza atividade oinsá fó klasifikasaun ba setór privadu sira hahú husi pré-kualifikasaun hodi haree no tuir sira-nia kapasidade, esperiénsia, kapitál ne’ebé mak iha, nune’e iha kompetisaun konkursu ruma karik, klase ida-ne’e mak tuir.
Iha fatin hanesan, Vise Prezidente CCI-TL, Agostinho Gomes, dehan enkontru ida-ne’e ho objetivu atu identifika setór privadu nasionál ne’ebé mak nia negósiu iha konstrusaun sivíl no obra públiku nian.
Nia esplika, empreza kontrusaun sivíl ne’ebé mak Kámara Komérsiu Indústria iha Timor-Leste rejista besik rihun 30.
Nune’e, CCI-TL ezije Governu loke lalais pré-kualifikasaun para empreza hotu-hotu tenke iha sertifikasaun no ema ne’ebé mak servisu tenke iha kualifikadu no klasifikadu.
Jornalista: Felicidade Ximenes
Editór: Xisto Freitas da Piedade
