DILI, 07 fevereiru 2025 (TATOLI)—Provedor dos Direitos Humanos e Justiça, Virgílio da Silva Guterres, hateten Provedoria dos Direitos Humanos e Justiça (PDHJ), Funsaun Públika (CFP-sigla portugés), Komisaun Antí Korrupsaun inklui Inspetór Jerál Estadu halo ona enkontru koordenasaun ba reativasaun pasa revista karreta Estadu iha fora oras serbisu.
“Iha ona enkontru entre dirijente entidade haat, iha-ne’ebé deside ona atu hahú inspesaun ba karreta Estadu sira ne’ebé sírkula iha fora oras serbisu,” Virgílio dehan ba TATOLI iha salaun João Paulo II, Komoro, Dili, sesta (07/02).
Nia esplika, iha enkontru ne’e, PDHJ rekomenda katak iha prosesu inspesaun ba karreta Estadu kuandu hetan funsionáriu ida lori karreta Estadu fora oras serbisu no tula nia família, presiza haree didi’ak hodi labele viola funsionáriu ne’e nia feen no oan nia direitu.
“Ita halo inspesaun ne’e ita-nia alvu ne’e ba ema ida-ne’ebé lori karreta ne’e. Se funsionáriu ne’e tula nia feen no nia oan iha karreta laran, entaun oinsá mak inspensaun ne’e tenke garante katak ninia feen no nia oan ne’e direitu la violadu, katak labele hasai sira-nia foto no halo sira-nia filmajen,” nia adianta.
Virgílio haktuir, kestaun ida-ne’e mak Adjuntu Provedór dos Direitos Humanos e Justiça ne’ebé trata asuntu Boa Governasaun hato’o iha enkontru ida-ne’e nune’e iha inspesaun ba karreta Estadu tenke haree iha boa governasaun ka lae, respeitu direitu umanu ka lae.
“Inspesaun ne’e atu hahú iha sá loron mak ha’u lahateten maibé posibilidade bele hala’o iha fulan ne’e. Tanba, ema bolu inspesaun ne’e entaun inspesaun urjente. Labele fó-sai data,” Virgílio informa.
Iha sorin seluk, Prezidente Komisaun Funsaun Públika, Agostinho Letêncio de Deus, esklarese Dekretu-lei nu: 80/2022 kona-ba regulamentu viatura Estadu nian seidauk alteradu, tan ne’e sei vale nafatin.
“Kuandu seidauk iha alterasaun, kuaker lei vale nafatin. Husu atu hotu-hotu uza viatura ba interese Estadu. Labele uza ba ita-nia interese privadu,” nia rekomenda.
Jornalista: Natalino Costa
Editór: Xisto Freitas da Piedade
