DILI, 07 Fevereiru 2025 (TATOLI) – Primeiru-Ministru, Kay Rala Xanana Gusmão, nomeia hikas eis-Embaixadór Japaun iha Timor-Leste, Iwao Kitahara, hodi kontinua asume knaar hanesan Kónsul-Jerál Onoráriu Timor-Leste nian ba Japaun ba mandatu tinan tolu tan.
Xefe Governu aprezenta ona kópia karta nomeasaun ba Embaixadór Kitahara, iha ámbitu jantar amizade, ne’ebé oferese husi atuál Embaixadór Japaun iha Timor-Leste, Tetsuya Kimura, iha nia rezidénsia nu’udár onra ida ba vizita Kitahara Iwao ho nia espoza.
“Governu Timor-Leste nomeia hikas Embaixadór Kitahara hodi kontinua serví hanesan Kónsúl Onoráriu bazeia ba nia dedikasaun no servisu ba Timór”, refere nota husi Governu ne’ebé Tatoli asesu.
Bainhira mandatu termina iha Timor-Leste nu’udár Embaixadór Japaun, Kitahara fila bá Japaun no estabelese Fundasaun Lorosa’e-Nippon hodi enkoraza no promove interkámbiu kulturál no amizade entre povu Japaun no Timór.
Embaixadór Kitahara hanesan belun boot Timór nian, tanba kontinua dedika-aan hodi hametin relasaun entre país rua ne’e.
Antigu Embaixadór nipóniku ba Timor-Leste ne’e nia mandatu hanesan Kónsul-Jerál Timor-Leste ba Japaun ne’e sei termina iha fulan oin, nune’e kontinua nomeia hodi asume knaar ne’e.
Lembra katak Governu anteriór, liuhusi Ministra Negósiu Estranjeiru no Kooperasaun, Adaljiza Magno, nomeia, iha 2022, eis-Embaixadór Japaun ba Timor-Leste ne’e nu’udar Kónsul-Jerál Onoráriu Timor-Leste ba Japaun ba mandatu tinan tolu.
Iwao Kitahara hanesan pesoál ne’ebé iha relasaun forte ho líder Timor-Leste nian no hanesan mós pesoál importante ne’ebé iha sosiedade sivil iha Japaun, ne’ebé bele tulun no ajuda halo koneksaun ba setór privadu sira no organizasaun sira seluk, atu nune’e bele tulun dezenvolve ekonomia no Indústria iha Timor-Leste, liuliu iha área peska, agrikultura, turizmu, no área sira seluk.
Notísia relevante: Governu nomea Kitahara Iwao nu’udar Honoráriu Konsul Jerál Timor-Leste ba Japaun
Jornalista: Arminda Fonseca
Edtora: Maria Auxiliadora
