DILI, 07 fevereiru 2025 (TATOLI)—Embaixadór Fransa ba Timor-Leste, Fabien Penone, hateten prezensa ró militár Fransa iha Timor-Leste nu’udár símbolu hametin kooperasaun Timor-Leste ho Fransa.
“Prezensa ró Fransa iha Timor-Leste nu’udár parte ida husi parseria husi nasaun rua no ami agradese tebes-tebes ba autoridade Timor-Leste tanba simu ami-nia ró no ekipa ró,” Fabien hateten ba jornalista sira iha edifísiu Ministériu Defeza, Fatuhada, Dili, sesta ne’e.
Diplomata ne’e haktuir katak hasoru malu ho Ministru Defeza Timor-Leste ko’alia kona-ba reforsa relasaun bilaterál entre Timor-Leste no Fransa.
“Kontente tebes-tebes mai iha Ministériu Defeza. Ha’u diskute kona-ba reforsa relasaun bilaterál. Hanesan imi hatene parseiru entre Fransa no Timor-Leste dezenvove lalais tebes. Entaun, ami parseiru ida kompriensivu ho Timor-Leste no kooperasaun iha defeza nu’udár prioridade ida ba ami,” nia afirma.
Hafoin hasoru malu ho reprezentante Ministru Defeza Timor-Leste, Embaixadór Fransa ba Timor-Leste ne’e hasoru malu mós Primeiru-Ministru, Xanana Gusmão hodi reforsa relasaun entre Fransa ho Timor-Leste sai prioridade ba Governu Fransa. Entaun, reforsa hela kooperasaun defeza no seguransa.
“Aleinde ne’e, ami hakarak diversifika ami-nia operasaun no parseria ho Timor-Leste. Tanba ne’e mak ami mós diskute ho Primeiru-Ministru reforsa ba ita-nia relasaun ekonómika sira no mós ita-nia parseria kulturál no universitáriu. Ami hakarak atu dezenvolve projetu konkretu sira ne’ebé maka fó benefísiu ba ita-nia nasaun rua ne’ebé mak hanesan ho ita-nia interese sira. Ami hakarak halo buat ruma ne’ebé konkretu no operasionál tebes, no sorumutu ne’e sai oportunidade di’ak ida atu bele estabelese orientasaun foun sira hodi dezenvolve liután ita-nia kooperasaun,” nia afirma.
Fabien informa, bainhira hasoru malu ho Primeiru-Ministru, diskusaun ne’e pozitiva tebes atu reforsa kooperasaun kona-ba seguransa no defeza, relasaun ekonómika, ezemplu dezenvolve no finansia ona portál Made in TL, ida-ne’e Fransa mak fó apoiu.
“Ami mós serbisu hela kona-ba investimentu iha ita-boot nia rain ba dahuluk kona-ba ami-nia kooperasaun kulturál. Ita sei iha artista timoroan ne’ebé sei konvida bá programa rezidénsia iha Fransa no inversamente ita sei iha artista fransés ne’ebé vizita Timor-Leste hela rezidénsia iha ne’e, iha Dili. Ami mós sei dezenvolve ami-nia kooperasaun universitária. Sei konvida mós PhD (doutór) timoroan bá Fransa. Entaun, Primeiru-Ministru kontente tebes ba projetu foun ida-ne’e no ami deside atu hakat liután bá ami-nia área operasionál,” nia esklarese.
Entretantu, ró militár forsa ho naran Vendemioire atraka iha Portu Dili, sesta ne’e (07/2), tuku 09:00 Otl. Durante loron rua estadia iha Portu Dili no sei fila iha domingu (09/2).
Jornalista: Natalino Costa
Editór: Xisto Freitas da Piedade
