VIKEKE, 09 Fevereiru 2025 (TATOLI)-Ministru Interiór (MI), Francisco da Costa Guterres, enkoraja funsionáriu sira husi Autoridade Protesaun Sivíl (APC, sigla portugés) no Seguransa Sivíl Patrimóniu Estadu, Diresaun Nasionál Prevensaun konflitu (DNPK) hodi servisu ho fuan.
“Ohin, ha’u hakarak ko’alia ho imi (funsionáriu) ne’ebé tulan iha MI nia okos, kada diresaun sira existe iha Viqueque hanesan APC, Bombeiru, DNPK no seguransa patrimóniu Estadu kada funsionáriu ida tenke hatene ninia papél. Tanba ne’e ha’u mai oinsá hadi’a ita-nia serbisu hodi ajuda Estadu liuliu servi povu no rai ida-ne’e ho fuan”, Ministru ne’e hateten ba Agência TATOLI,I.P hafoin enkontru ho funsionáriu sira, iha salaun evakuasaun, Sira-Lari, Caraubalu, Domingu ne’e.
Governante ne’e profundu instituisaun hirak ne’e importante hodi tau-matan no kontrola, inklui atende dezastre naturál sira-ne’ebé akontese iha munisípiu ne’e.
Hanesan seguransa sivíl ninia servisu atu asegura sasan patrimóniu Estadu sira-ne’ebé rai iha instituisaun Estadu sira, iha munisípiu Viqueque.
Tan ne’e imi tenke tau matan ba instiuisuan estadu sira tanba iha dokumentu importante sira rai iha laran, se imi la tau matan dokumentu importante sira bele lakon hotu no ema bele hatene ita-nia segredu sira. Tanba ne’e ha’u husu imi tenke tau-matan, labele uza farda la’o ba mai de’it”, Ministru ne’e apela.
Alende ne’e Ministru Francisco dehan sei buka problema sira-ne’ebé durante ne’e funsionáriu sira enfrenta hodi rezolve atu serbisu hotu la’o ho di’ak.
Iha fatin hanesan, Komadante APC munisípiu Vikeke, Cirilio Soares Gomes, agradese ba Ministru Interiór ho Prezidente APC bele mai vizita iha munisípiu Vikeke hamutuk diresaun tolu.
“Ami prontu simu orientasaun servisu, difikuldade ne’ebé ami hasoru mak menus kombustivél de’it ne’ebé ami fahe la hato’o, karreta operasionál ida de’it, bainhira ha’u uza tiha bá Dili, entaun funsionáriu sira labele ba terenu hodi halo identifikasaun ba dezastre sira. Tan ne’e, ami husu Ministru se bele buku solusaun ba ami-nia problema sira-ne’e”, nia hato’o.
Tuir dadus funsionáriu APC kompostu husi Bombeiru no Jestaun Risku dezastre naturál hamutuk na’in-28, Seguransa Patrimóniu Estadu hamutuk na’in-96 no DNPK na’in-16.
Jornalista : Vitorino Lopes da Costa
Editór : Florencio Miranda Ximenes
