DILI, 09 Fevereiru 2025 (TATOLI)-Governu liuhusi Sekretáriu Estadu Formasaun Profisionál no Empregu (SEFOPE), Domingu ne’e, entrega mate-isin José António Rebelo ba família iha Aeroportu Internasionál Nicolau Lobato,Dili.
Mate-isin José Rebelo, husi Koreia Súl to’o Aeroportu Internasionál ho aviaun Aero Dili iha tuku 6:45 dader.
”Ohin ita mai hamutuk iha ne’e hodi simu matebian José António Rebelo ne’ebé mak hakotu iis iha Korea Súl, entaun matebian ne’e ita konsidera hanesan eroi foun ba ita nia família no nasaun”, Diretór Jerál SEFOPE, Carlito Rosario Cabral, informa iha Aeroportu Internasionál, ohin.
Maske, Governu Timor-Leste liuhusi Adidu Trabaladór halo esforsu hodi koordena ho Governu Koreia Súl , hodi lori matebian ba tratamentu iha ospitál maibé la konsege salva matebian nia vida, tanba dezastre ne’ebé hetan todan tebes.
” Tanba ne’e, ami nia resposabilidade boot tebes liuhusi kordenasaun ho reprezentante iha Koreia, nune’e matebian bele to’o ita nia rain no ami entrega ba família hodi halo’ot tuir ida-idak nia kultura,”nia haktuir.
Matebian José António Rebelo da Silva, Moris iha Munisípiu Dili iha loron 17 Jullu 1995. Matebian oan husi Aman Domingos Martins da Silva no Inan Ines da Costa Rebelo Guterres, matebian iha maun alin na’in-rua no matebian husik hela nia kaben Adriana da Silva Pereira Oliveira no oan mane ida.
Matebian ramata nia Eskola Sekundária Jerál 05 de Maio, iha tinan 2013. Iha 2014 matebian kontinua fali eskola iha Universidade Dili (UNDIL) to’o deit semester haat la konsege ramata.
Matebian José António Rebelo da Silva, hahú kursu lian korea iha tinan 2017, matebian passa husi ezame Computer Basic Test (CTB),hodi rejistu ba sistema SPAS iha tinan 2018.
Matebian hetan kontratu husi Kompania Yu Jeongmi iha área fabrika. Iha loron 11 fulan Febreiru tinan 2019 hodi ba servisu iha Nasaun Korea du Sul, matebian serbisu iha kompania refere durante tinan lima fulan-hitu.
Iha loron, 01 fulan Setembru tinan 2024 matebian lori motor ho velosidade ne’ebé a’as hodi hetan asidente, soke poste eletrisidade iha oras tuku 07:00 dader. Matebian halo tratamentu fulan haat loron 17.
Esforsu hotu-hotu ne’ebé equipa mediku sira halo hakarak matebian atu rekopera husi moras ne’ebé nia hetan, maibé Maromak nia planu ba ema ida-idak la hanesan. Nune’e iha loron 18 fulan Janeiru 2025 matebian José António Rebelo da Silva hakotu is iha Hospitál Daejon-Jeon Korea do Sul.
Jornalista : Felicidade Ximenes
Editór: Florencio Miranda Ximenes
