DILI, 10 fevereiru 2025 (TATOLI)—Oknum Polísia Sientífika Investigasaun Kriminál (PCIC-sigla Portugés) ho inisiál FMG suspeitadu ba kazu tiru ameasa sidadaun na’in tolu iha área Delta 4, aldeia Aimeti-Laran, suku Comoro, postu Administrativu Dom Aleixo, munisípiu Dili, sábadu (8/2/2025), tuku 01:30 Otl.
Tuir kronolojia, oknum PCIC ho inisiál FGM uza arma tiru dala rua ba joven na’in tolu hanesan Salvador Leitão Belo Ximenes (17), Adérito Plácido Moreira (17) no Abílio Alberto Soares Carlos (17).
Bainhira ema na’in tolu ne’e fa’an hela iha área Delta 4, derepente oknum PCIC ho inisiál FMG ho pistola hakbesik bá iha sidadaun na’in tolu ne’e hodi dehan “mangame tiru tiha imi”. FMG tiru duni dala rua bá leten. Ho atu ne’e, sidadaun na’in tolu hakfodak no halai fahe malu bá subar iha abitante balun nia uma iha Gan 1 nú. 3, área Delta 4 nian.
Haree ba hahalok oknum PCIC nian ne’e, joven na’in tolu trauma no presta kedas keixa bá Departamentu Investigasaun Kriminál (DIK) Nasionál Komandu Jerál PNTL. Hafoin sidadaun na’in tolu ne’e presta tiha deklarasaun iha DIK, Departamentu Investigasaun Kriminál Nasionál rejista kedas kazu ne’e ho númeru NUC 0047/25/PNSIC no kazu ne’e submetidu ona bá Ministériu Públiku.
Xefe Departamentu Investigasaun Kriminál (DK), Superintendente Polísia, João Belo dos Reis, haktuir katak nia simu ona keixa refere nune’e Investigasaun Kriminál bele foti medida, aprezenta bá Ministériu Públiku hodi prosesa pesoal balun ne’ebé iha indikasaun ameasa sidadaun referida.
“Pesoál ne’e husi instituisaun balun. Ha’u labele temi iha-ne’e,” nia tenik ba jornalista sira iha Kuartél Komandu Jerál PNTL, Caicoli, segunda ne’e.
Nia dehan, seidauk hatene loloos motivu husi kazu ne’e, só prosesu investigasaun mak bele identifika tanbasá mak pesoál ne’e komete atu ida hanesan ne’e.
“Ita konsidera ida-ne’e sériu. Nune’e, ita sei halo prosesu no prosesu hotu-hotu ita sei entrega bá iha Ministériu Públiku hodi halo prosesu bá-oin,” nia adianta.
Belo esplika, bainhira uza arma ameasa ba ema seluk nia vida inklui ba alin na’in tolu, ne’e krime.
Belo salienta katak prosedimentu utilizasaun arma iha polísia ne’e ba serbisu, la’ós ba ameasa ema, satán uza arma hodi ameasa labarik sira ne’e krime.
Iha fatin hanesan, vítima Abílio Alberto Soares Carlos hateten durante ne’e nia ho nia kolega na’in rua halo atividade fa’an sigaru ne’e nein problema ho oknum referidu.
“Ami la goza nia. Ami fa’an sigaru iha bairru laran de’it. Ami lahatene tanba saida mak nia halo hanesan ne’e ba ami,” nia haktuir.
Vítima dehan katak oknum ne’e dala barak ona hatudu karater ameasa joven sira iha bairru Delta 4 ne’e.
Hatán ba kestaun ne’e, Diretór PCIC, Vicente Fernandes e Brito hateten nia simu ona informasaun ne’ebé hateten katak membru PCIC ida uza arma ameasa joven sira iha sábadu foin daudaun ne’e.
Tuir nia, membru ne’e investigadór ida iha PCIC maibé tanba kestaun prezunsaun inosénsia, entaun labele temi nia naran maibé kuandu iha inísiu sei aplika sansaun disiplinár ba membru referidu.
“Ohin mak ha’u simu informasaun ne’e. Portantu, ita iha prosedimentu própriu. Ne’e signifika katak laiha investigadór ida, laiha espesialista ida, laiha funsionáriu PCIC atu afasta husi responsabilidade,” nia afirma.
Nia dehan, ba kazu ida-ne’e nia la halo averiguasaun maibé aplika kedas sansaun disiplinár ba oknum PCIC ne’ebé envolve kazu referidu tanba faktu hatudu katak autór ameasa duni ema ho arma.
“Ha’u la halo prosesu averiguasaun. Averiguasaun enkuantu ita iha dúvida, más kuandu ha’u simu informasaun ne’e iha indísiu forte ha’u bá diretamente prosesu disiplinár,” realsa.
Jornalista: Natalino Costa
Editór: Xisto Freitas da Piedade
