DILI, 10 Fevereiru 2025 (TATOLI)—Governu liuhosi Ministériu Administrasaun Estatál (MAE), Diresaun Jerál Simplifikasaun no Modernizasaun Administrativu Lokál (SMAL), segunda ne’e, atribui ona ekipamentu eletróniku hanesan laptop, printer no desktop ba Postu Administrativu 66 iha territóriu.
“SMAL hahú kontratu IT (teknolojia no informasaun-nian, tetun) sira-ne’e ba postu administrativu 63 hahú kedas tinan kotuk, tinan 2025 nian ita kompleta ba postu foun ne’ebé foin harii, nune’e ita koloka IT ba autoridade Ataúru”, Diretora Nasionál SMAL, Maria Gorete Marques Belo, dehan iha salaun VIP MAE, Kolmera.
Objetivu hosi kolokasaun téniku IT ba kada postu administrativu sira no Ataúru mak oinsá tulun prosesu rejistu no atualiza dadus loloos ba dezenvolvimentu munisipál, baze dadus loloos hodi fasilita alokasaun anuál atu fornese dadus akuradu ho sistema ne’ebé dezenvolve hodi fasilita asesibilidade ba públiku. Sai nu’udar fonte ba dadus ne’ebé liga suku no munisípiu.
Akizasaun ba ekipamentu ne’e hahú kedas iha 2024 nian liuhosi unidade aprovizionamentu desentralizasaun nian, ne’ebé kobre de’it ba postu administrativu atuál.
“Ekipamentu hirak-ne’e ho marka HP. Nune’e biban ne’e hakarak informa katak ekipamentu ne’e mellora servisu sira iha postu administrativu, apoiu rekolla dadus ba portál munisipál no mós servisu seluk ne’ebé mak liga ho plataforma eletrónika”, Odete Gorete dehan.
Distribuisaun ne’e relasiona ho kompeténsia ne’ebé atribui ba Diresaun Jerál SMAL iha dekretu-lei 49 ne’ebé fó kompeténsia asegura no apoiu tékniku administrativu ba órgaun governanentál. Nune’e mós artigu 21 ne’ebé fó kompeténsia responsabiliza ba aktu sira relasiona simplifikasaun.
Proposta modernizasaun inklui asegura funsionamentu portal munisipál sira no fó asistensia ba iha munisípiu sira, kona-ba balkaun úniku ba munisípiu sira inklui autiridade Ataúru ninian ligadu kompeténsia ne’ebé temi ona
Sekretáriu Estadu Asuntu Toponimia no Organizasaun Urbana (SEATOU), Germano Santa Brites, hatete ekipamentu ne’e tenke utiliza tui dalan.
“Labele ba joga fali karta iha laran. Liliu iha toponímia nian, ita-boot sira tau GPS (Sistema Pozisionamentu Globál-tetun), tau numerasaun, estasionamentu, dalan no estrada sira, nune’e bele fasilita postu administrativu”, SEATOU dehan.
Sekretáriu Estadu Dezenvolvimentu Lokál (SEDL), Mateus do Santos Tallo, hatete ekipamentu ne’e atu apoiu servisu governu ninian, liliu ba programa boot governu nian ba desentralizasaun no poder lokál no dijitalizasaun servisu administrasaun públika nian.
“Ida-ne’e sai indikadór importante ne’e ita presiza tau matan. Tanba atu hatene ita-nia komunidade iha kraik, servisu sira ne’ebé liga ho administrasaun públika presiza ekipamentu. Entaun, ha’u-nia rekomendasaun ba ita-boot sira katak, ita-boot sira iha kompeténsia maibé hatudu ita-boot sira-nia professionál hodi bele fasilita ita-nia autoridade munisipál hodi informasaun ne’ebé lalais ba ita-nia komunidade liuhosi portal munusipál”, SEDL dehan.
Antes ne’e, MAE liuhusi Diresaun Jerál ba Desentralizasaun no Governu Lokál entrega ona komputadór ba administradór postu administrativu Kristu Rei, Don Aleixo, Vera Kruz, Nain-Feto, Metinaru ho Xefe Suku 31 iha munisípiu Dili.
Governu hakarak moderniza servisu administrasaun suku nian, liu-liu livru 18 ne’ebé mak presiza moderniza no dijitaliza liu-husi sistema integradu informasaun jestaun dadus suku no aldeia.
Notísia relevante: TIC Timor sensibiliza sistema dijitalizasaun no governu eletróniku iha Bobonaro
Jornalista : Osória Marques
Editora : Rita Almeida
