KOVALIMA, 10 fevereiru 2025 (TATOLI)-Sekretariadu Tékniku Administrasaun Eleitorál (STAE), Covalima seidauk dezloka tékniku sira atu halo atendimentu ba sidadaun sira hodi atualiza Kartaun Eleitorál (KE) Biométriku iha Postu administrativu Fatululik, Fatumea, Fohorem, Tilomar, Maucatar, Suai no Zumalai, tanba seidauk simu orientasaun no iha orsamentu.
“Tuir planu, marsu, ita atu halo atendimentu ho rotasaun ba sidadaun atualiza kartaun eleitorál iha postu administrativu sira maibé daudaun ne’e seidauk iha informasaun nune’e ami hein de’it orientasaun. Bainhira iha ona orientasaun, ami dezkola ba postu”, Diretór STAE Covalima, Farncisco Gusmão dehan ba TATOLI, iha Kampung- Baru, ohin.
Diretór ne’e dehan, atu halo atendimentu ba sidadaun sira iha postu administrativu sira presiza fó apoiu tan sistema ida tanba daudaun ne’e tékniku STAE halo atendimentu konsentra de’it iha STAE munisípiu, hodi hein apoiu tan sistema ida atu halo atendimentu ba sidadaun sira iha postu.
Kovalima iha nia postu administrativu hitu, tanba ne’e tékniku husi STAE sei halo atendimentu atualiza kartaun eleitorál no sidadaun ne’ebé nia tinan to’o ona 17 atu hasai foun ho de’it konsentra iha STAE munisípiu bainhira simu ona orientasaun sei koloka tékniku kada postu durante loron 10.
Kritériu ba sidadaun sira atu atualiza lori dokumentu sira hanesan kartaun eleitorál orijinál, sertidaun RDTL kópia tahan ida, aprezenta ho orijinál ka aprezente Billeti Identidade kópia no aprezenta mós orijinál no kópia Pasaporte válidu tahan ida no aprezenta mós orijinál.
Kritéria resensiamentu ba sidadaun ne’ebé atinji ona tinan-16 ba leten lori dokumentu hanesan, Sertidaun RDTL (foto kópia tahan ida), Billeti identidade válidu (orijinál no kópia tahan ida) ka Pasaporte Timor-lete válidu (orijinál kópia tahan ida), deklarasaun rezidénsia husi xefe suku no ba sidadania akredita presiza aprezenta sertifikadu sidadania Timor-Leste husi Ministériu Justisa (MJ).
Ba sira ne’ebé atu atualiza dadus hanesan hadi’a naran no loron moris sala lori dokumentu hanesan, Sertidaun RDTL ka BI, Pasaporte válidu (orijinál no kópia tahan ida).
Sidadaun muda hela fatin lori dokumentu hanesan deklarasaun muda hela fatin husi suku ne’ebé hela ba no Sertidaun RDTL ka BI, Pasaporte válidu (orijinál no kópia tahan ida)
Alende ne’e ba sira ne’ebé kartaun lakon lori dokumentu, deklarasaun lakon husi PNTL no Pasaporte válidu (orijinál no kópia tahan ida).
Bazea ba iha 2024 ne’e, sidadaun ne’ebé atualiza no hasai foun hamutuk 2,672 kompostu husi sidadaun ne’ebé mak atualiza kartaun eleitorál 2,478. Husi númeru ne’e, mane 1,234 no feto 1,244. Sidadaun ne’ebé nia idade to’o ona 17 hasai ona Kartaun Eleitorál (KE), foin hamutuk 194 kompostu husi mane 84 no feto 110.
Sidadaun Angelina Amaral, reforsa, STAE presiza sosializa informasaun no halo atendimentu mai iha postu administrativu sira atu fasilita sidadaun sira hodi atualiza kartaun eleitorál (KE) biométriku iha postu sira.
“Ita hatene tinan kotuk Governu halo ona lansamentu sistema atendimentu kartaun biométriku ne’ebé dadaun ne’e konsentra de’it iha munisípiu seidauk halo atendimentu iha postu administrativu tan presiza koloka tékniku halo atendimentu tanba importante hodi moderniza Kartaun eleitorál (KE),” nia rekomenda.
Jornalista:Celestina Teles
Editór :Rafael Ximenes de A Belo
