Abitante Afaloikai uma-kain 20 seidauk asesu eletrisidade
VIKEKE, 11 fevereiru 2025 (TATOLI)—Abitante uma-kain 20 iha aldeia Dasu-Uati, suku Afalokai, postu adiministrativu Uatulari, munisípiu Vikeke, to’o agora seidauk asesu eletrisidade.
Reprezentante abitante Dasu-Uati, suku Afaloikai, Marcelo Caetano, haktuir durante ukun aan ne’e abitante aldeia Dasu-Uatu ne’ebé hela iha foho baliza entre postu Uatulari (Vikeke) no postu Baguia, munisípiu Baukau seidauk asesu elereisidade.
“Ami iha ne’e tinan naruk ona la asesu eletrisidade. Ami hato’o beibeik ami-nia preokupasaun sira-ne’e ba suku, postu no ba Eletrisidade de Timor Leste, Empreza Públika (EDTL, E.P) maibé seidauk resposta ba ami-nia preokupasaun sira-ne’ebé ami enfreta durante ne’e,” Abitante Marcelo Caetano hateten jornalista sira, iha postu Uatulari, tersa ne’e.
Nia informa, iha tempu kalan ne’e abitante sira iha Dasu-Uati depende ba ahi-oan tradisionál hanesan kamii, lilin no solár panel maibé tempu udan abu-abu taka ona ne’e solár panel mós la funsiona tanba buat ne’e depende ba loron nia manas.
“Ami hakarak asesu informasaun ka notísia sira iha televizasaun maibé eletrisidade laiha, oinsá mak ami asesu. Tempu kalan, ami-nia oan sira hakarak estuda mós susár. Komunidade balun ne’e sosa lilin, entaun ninia oan estuda. Tan ne’e, mak ami hakarak husu ba Governu Konstituisionál da-sia (IX) haree ami-nia preokupasaun ba eletrisidade,” nia dehan.
Nia informa, komunidade parte aldeia Uaikai, Haenaudere asesu ona eleteisidade, maibé aldeia parte Dasu-Uati mak seidauk asesu liña eletrisidade.
“Ami-nia maluk sira husi aldeia sira besik ami ne’e asesu hotu ona eletrisidade ne’ebé liga husi Baguia, maibé ami mak seidauk asesu. Tan ne’e, ami rekomenda ba parte kompetente tau matan mós ba ami, atu ami mós sente hanesan ami-nia maluk sira seluk ne’ebé asesu ona eletrisidade,” nia hateten.
Iha fatin seluk, Koordenadór EDTL, E.P munisípiu Vikeke, Ernesto Sarmento hateten kona-ba preokupasaun abitante parte aldeia Dasu-Uati ne’ebé hela iha foho ba eletrisidade ne’e, ekipa tékniku EDTL, E.P halo ona levantamentu dadús no aprezenta ona ba EDTL, E.P nasionál hodi prosesu ba konkursu públiku.
“Ba aldeia Dasu-Uati iha tinan rua liu ba kotuk, ami halo ona levantamentu dadús no daudaun ne’e tama ona ba prosesu konkursu públiku ba empreza sira hodi konkere. Ne’ebé, prosesu sei la’o hela. Nune’e, ita hein rezultadu konkursu bainhira mak sai, maibé iha posiblidade sei implementa iha tinan ida-ne’e, depende ba parte aprozionamentu nasionál. Tanba ne’e, ha’u husu komunidade katak buat hotu la’o ho prosesu. Bainhira projetu ne’e sai, komunidade tenke kontribui liuliu ai-horis sira tanba laiha indeminizasaun,” nia hateten.
Tuir dadus, abitante aldeia Dasu-Uati, suku Afaloikai hela iha área rurál hamutuk uma-kain 20 no totál abitante hamutuk 200 ne’ebé seidauk asesu ba ahi eletrisidade.
Jornalista : Vitorino Lopes da Costa
Editór : Cancio Ximenes
