DILI, 11 fevereiru 2025 (TATOLI)–Deputada Bankada Governu husi Congresso Nacional da Reconstrução Timorense (CNRT), Cedelizia Faria Dos Santos, husu ba Governu atu tau-atensaun ba infraestrutura desportu, liuliu reabilitasaun estádiu munisipál Dili, relasiona ho jogu Komunidade País ho Lian Portugés (CPLP, siglá portugés).
“Ohin, iha kestaun ida hakarak levanta relasiona ho estádiu munisipál Dili ne’ebé to’o agora nia kondisaun ladi’ak, iha fulan-juñu 2025 ita-nia nasaun sei lidera jogu CPLP no ita hatene Konsellu Ministru aprova ona totál orsamentu relasiona ho okasiaun ne’e,” nia hato’o liuhusi reuniaun plenária iha Parlamentu Nasionál (PN), tersa ne’e.
Notísia relevante : Empreza 15 Realite hahú reabilita Jináziu Dili ba preparasaun jogu CPLP
Nune’e, nia husu ba Governu atu haree empreza sé mak atu halo reabilitasaun.
“Se IX Governu atu halo reabilitasaun estádiu munisipál Dili no ha’u-nia pergunta kontinua asaun saida mak foti husi Governu ba empreza anteriór ne’ebé inisia konstrusaun tinan barak ona seidauk finaliza to’o agora,” nia akresenta.
Iha sorin seluk, Vise-Ministru ba Asuntu Parlamentár, Adérito Hugo da Costa, dehan, relativa ho jogu CPLP, Ministériu Juventude Desportu no Arte Kultura (MJDAK) halo ona preparasaun sériu ba kondisaun kampu futeból ho infraestrutura sira seluk, prepara atleta no modalidade atubele partisipa iha eventu.
Jogu CPLP tinan ne’e sei hetan partisipasaun másimu husi Estadu membru sira, ho delegasaun hanesan Angola ho partisipante 101, Brazíl 101, Cabo Verde 101, Guiné-Bissau 61, Guiné Ekuatoriál 35, Mosambike 70, Portugál 101, São Tomé e Prinsípe 35 no Timor-Leste 101.
Eventu importante ida-ne’e hatudu Timor-Leste nia kompromisu atu haburas interkámbiu kulturál no atlétiku iha komunidade CPLP nia laran.
Jornalista : Nelson de Sousa
Editora : Julia Chatarina
