VIKEKE, 11 fevereiru 2025 (TATOLI)—Komunidade Kaiboki, aldeia Mane-Haat, suku Caraubalu, postu Viqueque Vila, munisípiu Viqueque, ofisiealmente entrega rai ba Governu liuhusi autoridade munisípiu Vikeke atu konstrui hospitál munisipál.
Notísia Relevante: Komunidade Uabubu-Caraubalu entrega rai ba Governu konstrui ospitál munisipál
Prezidente Autoridade Munisípiu (PAM) Vikeke, Francisco C.S de Gonzaga Soares, hato’o agradesimentu ba família Kaiboki Manuwe-Matan, ne’ebé entrega ona rai ho gratuita ba Governu Konstituisionál da-sia (IX) liuhusi Autoridade Munisipál Vikeke no Ministériu Saúde (MS) hodi prepara ba konstrui hospitál munisipál Viqueque iha futuru.
“Ha’u hato’o ha’u-nia agradesimentu ba família boot Kaiboki ne’ebé oferese ona fatin ida-ne’e, hanesan bee ida sulin hodi fó moris ba Viqueque oan tomak, liuliu ba mehi hodi harii ita-nia ospitál munisipál iha Viqueque iha future,” PAM Viqueque ne’e hateten iha serimónia entrega rai iha área internamentu Vikeke Vila, ohin.
Hafoin ramata entrega rai PAM Viqueque, kontinua observa direta ba kondisaun rai ne’ebé komunidade Kaiboki entrega ba Governu, ho medida rai meteru 200 × 100m ne’ebé lokaliza iha área Manuwe-Matan, Kaiboki, aldeia Mane-Haat, suku Karaubalu, postu Viqueque Vila.
Iha fatin hanesan, xefe suku Karaubalu, João Pinto, haktuir seremónia intrega rai husi komunidade aldeia Mane-Haat parte Kaiboki Manuwe-matan ba Estadu hodi estabelese ospitál iha munisípiu Viqueque.
Notísia Relevante: Falur propoin ospitál munisipál Viqueque tau naran “7 dezembru 1975”
“Rai ho medida naruk metru 200 no luan ho metru100 ne’ebé entrega ho gratuita, tanba ita hotu hatene katak parte importante mak edukasaun no saúde. Ne’eduni hodi Konsellu suku Karaubalu hato’o agradesimentu ba komunidade aldeia Mane-Haat, ho hanoin ne’ebé di’ak tebes hodi oferese sira-nia rai ho gratuita ba Estadu,” nia dehan.
Iha biban ne’e, reprezentante na’in ba rai, Domingos dos Reis Baptista, hateten sira oferese rai ho gratuita hodi harii ospitál atu fasilita komunidade ne’ebé moras tanba ne’e oferese rai ba Estadu no Governu.
“Ami ofrese ami-nia rai ho gratuita atu hodi harii ospitál iha munisipiu Vikeke hodi fasilita komunidade ne’ebé moras, atu halo konsulta de’it iha munisipiu. Karik Estadu ba futuru la realiza, ami nu’udar na’in ba rai sei foti fali rai ne’ebé ami oferese ba, atu halo ami-nia uma hodi hela ba,” nia hateten.
Iha serimónia entrega rai ne’e, na’in ba rai entrega direta ba PAM Viqueque no kontinua entrega ba diretór Servisu Saúde Munisípiu Vikeke.
Entretantu, serimónia ne’e partisipa husi Sekretáriu Munisipál Asuntu Sosiál, Komandante Polísia Nasionál Timor Leste (PNTL) Munisípiu Vikeke, Segundu Komandante Eskuadra Postu Viqueque Vila, OPS suku Karaubalu, Veteranu, Administradór Viqueque Vila, Diretór Terras Propriedade, funsionáriu, na’in ba rai, lia-na’in no komunidade.
Notísia Relevante: MS ho autoridade diskute planu konstrusaun ospitál munisipál Viqueque
Jornalista : Vitorino Lopes da Costa
Editór : Cancio Ximenes
