KOVALIMA, 11 fevereiru 2025 (TATOLI) – Xefe Suku Suai Loro, Manuel Gomes da Costa husu ba Governu atu reabilita, postu Unidade Polísia Maritima (UPM), iha Suku Suai Loro, Postu Suai, Munisípiu Kovalima.
“Ha’u haree kondisaun postu polísia UPM sira hela la dignu ba sira, tanba sira hela iha uma ne’ebé mak uluk atu loke negósiu ki’ik tanba sira hakarak garante seguransa ba komunidade iha área tasi nian”, Lideransa Komunitária, Manuel Gomes da Costa informa ba TATOLI iha Suai Loro, ohin.
Ho nune’e, autoridade lokál ne’e dehan, Governu presiza atu tau-matan ba kondisaun referida tanba halo sira destaka maibé haree kondisaun la dignu ba sira no mós la iha ekipamentu ró atu halo patrullamentu.
Líder másimu ne’e mós konsidera katak kondisaun ba autoridade polisiál sira ne’e mós la adekuadu tanba la seguru no ekipamentu ba halo patrullamentu mós kestionavel.
“Presiza iha ró nune’e atu bele fasilita sira atu bele kontrola ita hakaas maibé la iha ekipamentu”, nia rekomenda.
Kona-ba asuntu ne’e bainhira jornalista atu konfirma ho komandante Postu UPM Suai labele fó informasaun, tanba la hetan autorizasaun husi Komandante Unidade UPM no Komandu Jerál.
Bazeia ba observa husi Jornalista TATOLI nota katak , molok postu UPM estabelese iha Fronteira Mota masin no postu UPM muda iha mai iha suku Suai loro iha 2020. Iha 2021 anin sobu postu UPM Suai hafoin sira na’in rasik hadi’a no iha loron 05 fevereiru 2025 ne’e anin sobu tan nune’e bainhira tempu UPM sira la deskansa tanba udan turu tuun iha sira-nia hela fatin.
Maske ho kondisaun ne’ebé la dignu no la iha ekipamentu atu halo patrullamentu iha tasi, maibé Unidade Polìsia Marítima Suai Loro na’in ualu ne’e la lakon vontade no kontinua hala’o sira-nia servisu.
Entretantu, Parlamentu Nasionál (PN), aprova Orsamentu Jerál Estadu 2025 ba Polísia Nasionál Timor-Leste hamutuk $ 46,420.430.
Jornalista:Celestina Teles
Editór :Rafael Ximenes de A. Belo
