VIQUEQUE, 11 Fevereiru 2025 (TATOLI)—Xefe Sentru Saúde postu Viqueque Vila, João Corte Real, informa daudaun ne’e postu saúde lima mak laiha pesoál saúde hanesan parteira ne’ebé difikulta ba inan isin-rua sira atu partus.
“Postu Viqueque Vila ami iha postu saúde hamutuk 12 no husi númeru ne’e postu saúde lima (5) mak iha pesoál saúde hanesan parteira iha, maibé postu saúde lima laiha pateira. Nune’e, sai difikulta ba inan-isin-rua sira atu partus, halo konsulta no partus ruma iha suku susar, tenke transfere ba Internamentu,” Xefe sentru saúde ne’e hateten ba Agência Tatoli iha postu Viqueque Vila, ohin.
Nia hatutan, presizs halo rekrutamentu ba pesoál saúde sira inklui médiku hodi koloka ba postu saúde sira-ne’ebé laiha hodi fó atendementu ba komunidade iha suku.
“Ba oin, ita presiza halo rekrutamentu. Ne’ebé, preokupasaun ba pesoál saúde nian, ami aprezenta ona ba nasionál. Aban bainrua halo rekrutamentu karik, kompleta parteira nomós médiku, tanba daudaun ne’e médiku na’in haat (4) mak koloka iha postu saúde Beobe, Ratahau, Bikarin no Uaimori, enkuantu iha postu saúde ualu (8) laiha médiku. Atu rekruta ne’e, desizaun husi Ministériu”, nia hateten.
Maske limitadu, nia dehan, pesoál saúde kontinua halo atendementu ba pasiente iha kada postu kontinua la’o normál, kazu emerjénsia ruma iha postu saúde ne’e enfermeiru sira hmtranfere ba ospitál internamentu.
Entretantu, postu saúde sira-ne’ebé pesoál saúde parteria laiha mak hanesan Ratahau, Uaimori, SP2 Luca, Bibileo no Beobe.
Jornalista : Vitorino Lopes da Costa
Editór : Cancio Ximenes
