DILI, 11 fevereiru 2025 (TATOLI)–Prezidente Repúblika, José Ramos Horta, nomeia ona Antonio da Conceição “Kalohan” sai Embaixadór Extraordinariu no Plenepotensiáriu Timor-Leste nian ba Suisa hodi troka Embaixadora Lurdes Besa ne’ebé mandatu termina ona.
Notísia Relevante: Tribunál mantein halo julgamentu ba Kalohan inklui arguidu 12
Nomeisaun ne’e fó sai liuhusi dekretu Prezidente Repúblika Nú.3/2025, loron 07 fulan-fevereiru.
Prezidente Repúblika, José Ramos Horta. hateten loloos pose ba Embaixadór Kalohan iha semana kotuk maibé nia rasik mak husu atu adia tanba Prezidente Repúblika nia kondisaun moras.
“Ha’u rasik mak husu adia tia pose ne’e tanba ha’u nia kondisaun moras hela, ita haree lai aban ou bairua mak ita fó posse ba Doutor Kalohan nu’udar Embaxadór ba Zeneva,” Horta hateten ba jornalista sira iha Palasiu Prezidensial Dili, tersa ne’e.
Ho dekretu ne’ebé fó sai ona, Agência TATOLI kontaktu direita ho Antonio Kalohan hodi konfirma nia pozisaun maibé Kalohan hili nonook hodi la fó komentáriu.
Konstituisaun Repúblika Demokrátika Timór-Leste fó ba Prezidente Repúblika kbiit iha ámbitu relasaun internasionál nian atu nomeia no ezonera embaixadór sira, reprezentante permanente sira no enviadu estraordináriu sira, tuir proposta husi Governu, tuir termu sira hosi ninia artigu 87, alínea b).
Prezidente Repúblika, tuir termu sira artigu 87, alínea b), Konstituisaun Repúblika Demokrátika Timór-Leste nian, dekreta António da Conceição hetan nomeasaun nu’udar Embaixadór Estraordináriu no Plenipotensiáriu Timor-Leste nian iha Suisa.
Notísia Relevante: Ezonera António da Conceição, Assanami: “Ne’e Prezidente nia Podér”
Jornalista : Hortencio Sanchez
Editór : Cancio Ximenes
