BOBONARU, 12 Fevereiru 2025 (TATOLI)—Diretór Diresaun Transporte Terrestre (DTT) delegasaun teritoriál Munisípiu Bobonaru, ho vontade rasik kontribui ninia karreta privadu hodi fasilita ekipa sira halo servisu Estadu nuan iha terrenu no halo viajen servisu ba Dili tanba seidauk simu karreta Estadu.
Diretór DTT Munisípiu Bobonaru, Tomás Maia, hateten tinan hirak liuba ne’e DTT Bobonaru iha duni karreta unidade ida (1) maibé veikulu Estadu nian tama lelaun iha 2017 to’o ágora Governu seidauk substitui karreta foun hodi fasilita funsionáriu operasionaliza servisu iha terrenu.
Notísia Relevante: DNTT Bobonaro presiza fasilidade atu atende komunidade
“Hahú 2017 bainhira karreta Ford-Rangger ne’e lelaun tiha hotu, ha’u mak fasilita karreta to’o ohin loron. Ha’u sai diretór tanba ATK ita labele ba foti ho motór, depois ba foti sinál tranzitu iha Dili mai halo manutensaun ne’e tinan-tinan ita halo,” Diretór Tomás Maia informa ba jornalista sira, iha nia kna’ar fatin Soso Maliana, kuarta ne’e
Nu’udár timoroan, Tomás Maia hakarak kontribui saida mak nia bele halo maibé Governu mós presiza buka meiu atu rezolve problema ne’e.
“Agora problema boot ida mak ne’e, ita uza transporte privadu ba, ita husu kupon konbustível nian iha superiór sira dehan labele tanba transporte privadu. Agora, ha’u lori hau-nia karreta privadu fasilita servisu Estadu nian, nusa mak Estadu labele ajuda ha’u, ne’e susar,” nia hateten.
Diretór ne’e haktuir foin lalais iha 2022 ne’e DTT Munisípiu Bobonaru konsege hetan apoia motorizada unidade rúa husi Governu, maibé transporte ne’e la sufisiente no labele utiliza ba tula materiál servisu iha Dili.
Nia konfirma, problema ne’e dezde mandatu diretór sesante to’o ágora hato’o beibeik ba Ministériu Transporte no Telekomunikasaun, maibé to’o ágora seidauk iha rezultadu.
“Ita husu iha ne’ebá dehan iha ne’ebá mós araska. Depois problema ne’e kuaze 13 Munisípiu ne’e hansan hotu. Ita hatama pedidu ba husu kareta, munisípiu seluk mós husu karreta,” nia dehan.
Tuir dadus 2025, DTT Munisípiu Bobonaru iha funsionáriu na’in-28 ne’ebé kompostu fhusi unsionáriu permanente na’in-lima no restu ne’e kazuál.
Notísia Relevante: DNTT Bobonaro laiha orsamentu manutensaun ba sinál tránzitu
Jornalista : Sergio da Cruz
Editór : Cancio Ximenes
