VIKEKE, 12 Fevereiru 2025 (TATOLI)—Sekretáriu Zona 20 de Maio Ossú, postu Ossú, Candido Henrique da Silva “Daiuari”, informa kombatente rejistadu 2009 sira iha postu administrativu Ossú hamutuk na’in-100 mak prienxe ona fixa kontestasaun tanba sira-nia dadus iha lista editál ne’e sala.
“Ba ita-nia haree, ba lista editál rejistadu 2009, kombatente husi postu Ossú ne’ebé uluk kontribui ba ukun rasik aan, balun hetan torturasaun, dadus editál sai mai ne’e balun mak la kompleta no tuir sira-nia dadus loloos. Ne’ebé, Governu distribui fixa ba zona sira hodi fahe ba kombatente sira hodi prienxe fixa kontestasaun kontestasaun. Nune’e, ba postu Ossú to’o mai agora, kombatente hamutuk na’in-1.506. Husi númeru ne’e, kombatente na’in-100 hatama ona karta reklamasaun ba ami zona, hodi aprezenta fali ba Konsellu Kombatente Veteranu Libertasaun Nasionál (CCLN, sigla portugés) munisípiu Vikeke,” Candido Enrique da Silva hateten ba Agência Tatoli, iha postu Ossú, ohin.
Nune’e, nia husu nafatin ba kombatente sira-ne’ebé rejistadu 2009, karik sira-nia dadus sala mak seidauk halo kontestasaun tenke kompleta no buka testamuña hodi kompleta sira-nia dadus kombatente nian ne’e.
“Daudaun ne’e fixa sei iha ha’u no kombatente balun seidauk hetan karik, mai foti fixa. Tanba, tempu ba prienxe fixa kontestasaun ne’e to’o loron 60 de’it. Se liu ida-ne’e, la simu ona nune’e ha’u husu ba kombatente sira tenke aselera prienxe fixa konstestasaun referida,” nia esplika.
Nia dehan, Zona 20 de Maio Ossú kontinua apoia kombatente sira hadi’a sira-nia dadus ne’ebé sala hodi halo loos fila-fali mak hatama fali ba konsellu kombatente.
Iha fatin seluk, Sekretáriu ezekutivu CCLN munisípiu Vikeke, Daniel Sarmento “Fogeti”, relata daudaun ne’e CCLN Vikeke simu ona fixa kontestasaun hamutuk rihun 6.049 ba faze dahuluk nian.
“Kombatente sira-ne’ebé halo konstestasaun ne’e ami simu rihun 6.049, hein prezidente CCLN asina hodi lori ba nasionál ne’e ba faze dahuluk husi loron 30 nian lori ba hatama tiha, depois sei kontinua simu faze daruak nian tanba durasaun loron 60 de’it,” nia dehan.
Tuir nia, kona-ba dadus kombatente husi munisípiu Vikeke ne’ebé rejista iha tinan 2009 totál hamutuk na’in-7.775, kombatente ne’ebé liu verifikasaun hamutuk na’in-5.920.
Husi númeru kombatente totál hamutuk na’in-6.049 hato’o ona keixa reklamasaun ba dadus kombatente ne’ebé sala no balun ne’ebé naran la sai iha lista editál.
Jornalista : Vitorino Lopes da Costa
Editór : Cancio Ximenes
