DILI, 12 Fevereiru 2025 (TATOLI) – Ministériu Finansa liuhusi Diresaun Unidade Nasionál no Relasaun Públika halo abertura ba proposta leilaun no loke kaixa leilaun ba patromóniu Estadu. Karreta ne’ebé halo leilaun hamutuk unidade 298 no motorizada 2.014.
Prezidente Komisaun Leilaun, Timótea Marques, hateten programa ne’e parte integradu husi polítika Governu nian atu salvaguarda patrimóniu Estadu, liuliu atu hetan rendimentu mínimu husi prosesu alienasaun nian.
Aleinde atu redús kustu manutensaun no reparasaun ne’ebé boot liu ba sasán sira ne’ebé konsideradu prazu utilizasaun liu ona no la tuir ona nesesidade bázika Governu nian.
“Beins móves hirak ne’ebá la utiliza ona no tama ona ba períodu limite utilizasaun no la nesesita ona atu kontinua uza, presiza hapara nia utilizasaun no hapara nia responsablidade iha jestaun nian husi Governu. Ho nune’e maka dalan úniku atu hapara nia estatutu hanesan patrimóniu Estadu nian maka tenke liuhusi meiu alienasaun nian, nune’e labele hasai tan despeza ne’ebé boot ba iha manutensaun no operasionál sira seluk”, Timótea Marques ba Tatoli, iha Balide, ohin.
Nia esplika katak prosesu alienasaun sei sentraliza iha Ministeriu Finansa, tanba kestaun polítika fiskál, nune’e maka husu liña ministerial no instituisaun Estadu nian hotu atu kolabora no koordena nafatin ho Ministériu Finansa hodi asegura utilizasaun patrimóniu Estadu to’o períodu ne’ebé determinadu.
Lembra katak, iha tinan 2024, ho deklarasaun no proposta ne’ebé mai husi liñã ministeriál (LM) no instituisaun Estadu (IE) sira, nomós munisípiu sira hamutuk 30 ne’ebé kompostu husi LM/IE 20 no munisípiu 10 no Komisaun Leilaun halo ona aprovasaun ba modalidade leilaun, ne’ebé aprova ho modalidade konkursu públiku no konkursu internu ne’ebé Ministra Finansa omologa ona lista ne’ebé submete ona.
“Ohin, ita deside halo konkursu públiku no konkursu internu atu fó oportunidade ba ema hotu bele tuir prosesu ne’e tantu públiku komu funsionáriu sira hotu atu partisipa no bele hetan benefísiu husi prosesu ida-ne’e”, dehan.
Nia garante katak Diresaun-Jerál Jestaun Patrimóniu Estadu kontinua asegura atu prosesu hirak ne’e lao ho tranparánsia, integridade no responsablidade.
Prosesu implementasaun leilaun ba faze XVII-B aprova lista modalidade leilaun iha loron 26 Novembru 2024, hetan omologasaun husi Ministra Finansa, Santina Cardoso, iha loron 05 Dezembru 2024.
Nune’e, Diresaun-Jerál Patrimóniu Estadu implementa ona desizaun komisaun leilaun nian tuir kalendáriu sira ne’ebé iha públikasaun avizu taka iha loron 26/12/2024 to’o 10/01/2025 no submisaun proposta hahú husi 13-31 Janeiru 2025.
“Ami hakarak atualiza ba públika katak konkursu públiku ka formuláriu ne’ebé ita fó sai rekerente sira ne’ebé mai foti formuláriu hamutuk 9.771, hafoin hatama fali ba kaixa leilaun hamutuk 3.257 no formuláriu la hatama 6.285”, nia adianta.
Iha fatin hanesan Provedór Direitu Umanu no Justisa, Virgílio da Silva Guterres, hateten atividade leilaun ne’e importante tebes, tanba ida-ne’e esforsu kolletivu atu halo poupansa ba despeza sira ne’ebé hasai ba manutensaun veíkulu nian.
“Ita hotu fiar katak prosesu ida-ne’e mós hola parte iha serbisu kolletivu nian oinsá atu halo poupansa ba ita-nia kustu manutensaun nian. Entaun veíkulu no ekipamentu sira seluk ne’ebé uza nia tempu to’o ona, buka meiu ba públiku hodi hetan redimentu ruma”, nia hateten.
Iha abertura ba atividade leilaun nian ne’e hetan mós partisipasaun husi Komiasaun Anti-Korrupsaun.
Notísia relevante: Empreza manán-na’in foti ona karreta leilaun 43 hosi Governu
Jornalista : Arminda Fonseca
Editora : Maria Auxiliadora
