VIKEKE, 12 Fevereiru 2025 (TATOLI)—Sekretáriu Estadu Kooperativa (SECoop, sigla portugés), Arsénio Pereira da Silva, fó motivasaun ba komunidade Bahalara Uain, postu Vikeke Vila, munisípiu Vikeke, atu envolve iha kooperativa HAMAIFOR atu hadi’a ekonomia família iha baze.
Nia hatutan, komunidade tenke hakbesik aan ba funsionáriu SECoop nian ne’ebé destaka iha Vikeke hodi envolve aan iha kooperativa tanba kooperativa mak fó rendimentu di’ak.
“Tanba rezultadu Kooperativa Créditu Uniaun Halibur Aman Maun Alin Inan Feton Ra’es (HAMAIFOR) iha suku Bahalara Uain, foin eziste tinan tolu (3) maibé sira-nia kapitál hamutuk $47,00.00. Ho númeru kapitál ida-ne’e, iha área sira mak hanesan ita bele dehan boot. Entaun, ida-ne’e mak ha’u husu ba komunidade oinsá envolve aan ba kooperativa no forma kooperativa tanba Governu prontu atu fasilita kooperativa sira liuhusi formasaun báziku sira.” Arsénio Pereira da Silva hateten ba jornalista sira hafoin ramata abertura asembleia jerál Kooperativa Uniaun Kréditu HAMAFOR, iha edifísiu HAMAIFOR, aldeia Aisahe, suku Bahalara Uain, ohin.
Alenide ne’e, Governante ne’e apresia ba progresu dezenvolvimentu HAMAIFOR no nafatin la’o ba oin ho kooperativa rai osan no inklina aan ba produtu sira seluk.
“Tan ne’e, ha’u mai hodi motiva sira hodi dezenvolve aan di’ak liután, tanba ita haree Kooperativa HAMAIFOR ninia dezenvolvimentu la’o diak tebes. Nune’e, ha’u husu atu ba oin mobiliza tan komunidade seluk hodi envole aan iha kooperativa,” nia dehan.
Prezidente HAMAIFOR, Mateus Soares, hato’o agradesimentu ba prezensa Sekretáriu Estadu Kooperativa (SECoop, sigla portugés), Arsénio Pereira da Silva, ninian iha asembleia Jerál ne’ebé kada tinan realiza, ida-ne’e hanesan parte ida hodi motiva di’ak liután no bele lori Kooperativa HAMAIFOR hakat ba oin.
“Ha’u rekomenda ba Governu liuhusi SECoop, atu ba oin kontinua fasilita formasaun kontinuasaun, halo akompañamentu, monitorizasaun no superviziona nafatin ba sira-nia atividade hodi nune’e bele iha sustentabilidade ba futuru,” nia hateten.
Kooperativa HAMAIFOR inisia iha loron 10 fulan-Juñu iha tinan 2021, ho membru no fundadór hamutuk ema na’in-33 no harii ho kapitál $1,056.
Enkuantu, membru Kooperativa HAMAIFOR atuál ne’e ho totál hamutuk ema na’in-121 ne’ebé kompostu husi feto na’in-66 no mane na’in-55, no kapitál akumula ona osan hamutuk $47,000.
Entretantu, Asembleia Jerál Kooperativa HAMAIFOR ne’e partisipa husi
sekretáriu asuntu organizasaun no komunitária Munisípiu Vikeke, autoridade lokál no membru Kooperativa HAMAIFOR na’in-121.
Jornalista : Vitorino Lopes da Costa
Editór : Cancio Ximenes
