VIKEKE, 13 Fevereiru 2025 (TATOLI)—Autoridade Protesaun Sivíl (APC, sigla portugés) munisípiu Vikeke, rejista dadús provizóriu uma kain hamutuk 50 ne’ebé afetadu ba dezastre naturál ne’ebé akontese iha fulan-Fevereiru 2025 ne’e.
Komadante APC minisípiu Viqueque, Cirilio Soares Gomes, hateten iha fulan-Fevereiru ne’e akontese anin boot no udan afeta ba komunidade nia uma iha postu haat mak dadus tama ona iha APC maibé dadus ne’e sei provizóriu.
“Akontesementu anin boot no udan hahú akontese iha 10 fulan-Fevereiru ne’e ami hahú simu informasaun husi autoridade kada postu administrativu no inkui ita-nia komunidade vítima sira. Nune’e, dadus provizóriu ne’ebé ami simu ne’e hamutuk 50 no husi númeru ne’e ohin mak ami-nia ekipa foin ba postu Uatucarbau no Uatulari hodi halo verifikasaun. Depois, postu rua hotu hafoin kontinua ba postu seluk,” Komadante APC munisípiu Vikeke ne’e hateten ba jornalista sira, iha nia kna’ar fatin, Sira-Laran, ohin.
Komadate APC ne’e salienta, daudaun ne’e ekipa iha postu Uatucarbau no Uatulari halo levantamentu dadus uma sira-ne’ebé afeta ba dezastre naturál hanesan anin-boot estraga komunidade nia uma.
“Dadús verifikadu uma tolu iha postu Ossú mak ami verifika ona no uma tolu ne’e merese atu hetan apoiu husi APC, balun mak seidauk verifika loloos,” nia dehan.
Depois, nia dehan, levantamentu dadus afetadu ne’e ramata hafoin distribui apoiu emerjénsia ba vítima sira.
Nune’e, levantamentu APC labele rekolla lalais dadus afetadu sira tanba menus rekursu umanu no transporte karreta. Daudaun ne’e, APC ba halo verifikasaun dadus no jestaun dezastre naturál na’in-rua (2) no karreta ida (1).
“Ida-ne’e sai hanesan ami-nia dezafiu ida ba ami tanba munisípiu Vikeke suku 38, ho rekursu ne’ebé limitadu. Ho dezafiu sira-ne’e ami hato’o ona ba nasionál,” nia dehan.
Tuir dadus provizóriu, APC rejista postu administrativu Uatulari uma kain 20, Uatukarbau uma kain hitu (7) no Ossú uma kain tolu (3).
Iha fatin hanesan, vítima dezastre naturál husi aldeia Manulari, suku Uagia, postu Ossú, Domingos Ximenes Guterres, haktuir akontesementu anin boot halo ai monu-hanehan uma hetan estragu ne’ebé akontese iha loron 10 fulan-Fevereiru iha 16h00 lorokraik.
“Iha akontesementu loron ne’ebé la afeta ba ha’u-nia membru família sira maibé uma mak hetan estragu. Nune’e, ohin, ami direta mai APC hodi apoia pakote emerjénsia hanesan nesesidade bázika hanesan foos, mina, biskuit, sardina, supermie no pakote sira seluk. Ho apoia sira-ne’e ami husu agradese ba parte Governu ne’ebé hakmaan ona ami-nia sofrementu,” bia dehan.
Nia informa, totál membru família hamutuk na’in-hitu (7) ne’ebé kompostu husi inan-aman no oan na’in-lima (5) ne’ebé daudaun ne’e hela iha uma provizóriu.
Jornalista : Vitorino Lopes da Costa
Editór : Cancio Ximenes
