KOVALIMA, 12 fevereiru 2025 (TATOLI) – Bee Timor-Leste, Empreza Públika (BTL.E,P)Kovalima durante fulan 12, hahú janeiru to’o dezembru 2024 ne’e kontribui ona reseita $ 34,528,25 ba kofre Estadu.
Koordenadór BTL,E.P, Castro Dody Ramos, esplika katak, reseita ne’ebé mak BTL.E,P Kovalima kontribui mai husi bee-moos rasik ne’ebe halo ligasaun foun no tanke bee-moos ne’ebé ho totál kliente hamutuk 1,196 no populasaun ne’ebé asesu ona bee-moos 12,267, iha Kovalima.
“Reseita sira ne’e ami kobre mai husi kliente sira ne’ebé ami kobre iha área urbana husi suku Debos,Camenasa no Suai Postu administrativu Suai no iha Suku Ogues postu Maucatar balun ne’ebé asesu bee-moos”, Castro Dody Ramos, relata dadus ne’e ba jornalista sira iha nia servisu fatin, ohin.
Atividade ne’ebé mak durante BTL.E,P Kovalima hala’o iha 2024 ne’e konsege instala ona metru kontadór hamutuk unidade 450 barak mak seidauk instala, maibé daudaun ne’e projetu ne’ebé implementa iha área urbana sei kobre metru kontadór hamutuk 1500 iha área urbana.
BTL nafatin hasoru difikuldade distribui bee-moos ba komunidade tanba rekursu bee mai husi bee-matan ida de’it husi Suai Loro Sukabilaran maske iha alternativa bee-matan rua ne’ebé implementa hosi empreza Jufado Unipesoal Lda espera bele finaliza lalais tanba implementa projetu dada bee-moos besik tinan rua.
“Ho rekursu bee ne’ebé mak ita iha provizóriu ita seidauk ko’alia sufisente tanba komunidade iha fatin balun seidauk asesu bee-moos ho di’ak maske balun di’ak ona haree ba presaun bee-moos ne’ebé ita fornese ba komunidade” nia dehan.
Bazea ba dokumentu ne’ebé TATOLI asesu, tarefáriu ba kliente ne’ebé tékniku BTL,E.P Kovalima dada bee-moos ba uma-kain sira ho tipu doméstika selu mínimu $ 55.00 másimu $ 100.00 no ligasaun ba edifísiu sira selu $ 200.00 depende medida kanu ne’ebé iha.
Mekanizmu kliente selu BTL.E,P Kovalima aplika bazeia ba lei. Kliénte uza bee-moos 14 metru kúbiku selu sentavu 0,20, ba kliente uza bee-moos ho tipu doméstika nune’e kada fulan selu $ 2,80 sentavu, maibé depende kliénte sira uza bee-moos nune’e kada fulan balun selu $ 1.00-resin balun selu $ 2.00-resin.
Kliente Fernando Araujo dehan, ho ezisténsia BTL E.P asesu bee-moos ho ladun masimu maibé daudaun ne’e komunidade sira ladun konsumu ona bee mota no bee posu, tanba kada semana BTL.EP distribui bee-moos dala rua.
“Ho prezensa BTLita konsidera bele rezolve ona komunidade nia problema asesu ba bee-moos maske ladun ho masima maibé ita hemu ita la buka ona bee tanba kada semana distribui bee la falla, bainhira makina aat mak bee foin lasai”, nia informa.
Jornalista:Celestina Teles
Editór :Rafael Ximenes de A Belo
