DILI, 13 Fevereiru 2025 (TATOLI) – Bee Timor-Leste, Empreza Públika (BTL, E.P) rekolla, entre Janeiru no Dezembru 2024, reseita hamutuk millaun $1,6 ba kofre Estadu.
Prezidente Komisaun Ezekutiva BTL, E.P, Gustavo da Cruz, hateten reseita ne’e mai husi kanalizasaun bee, selu bee kada fulan husi kontadór, teste bee iha laboratóriu, fa’an bee-moos, fakar bee fo’er no seluk tan.
“Reseita ne’ebé BTL rekolla iha 2024 ne’e pasu pozitu ida, tanba estimativa iha 2024 ne’e hamutuk $1,074.000, maibé kobre liu tiha $1,595.584”, Gustavo da Cruz dehan ba Tatoli, ohin.
Nia lembra katak, iha 2021, BTL sai hanesan empreza públika no sempre kontribui reseita di’ak ba Estadu.
Tuir estimativa, iha 2021, BTL presiza rekolla reseita rihun $170 no iha nia implementasaun arrekada $256.461 no iha 2022, tau estimativa rihun $250, maibé konsege rekolla $611.532. Iha 2023, hasa’e estimativa ba $948.005 no rekolla millaun $1.
“Ba 2025, orsamentu ne’ebé aloka ba BTL hamutuk millaun $10. Ida-ne’e ba programa rua, boa governasaun, fortalesimentu instituisionál no melloramentu sistema bee no saneamentu”, realsa.
BTL iha objetivu atu jere no fornese bee no saneamentu, hodi garante kualidade no asesibilidade ba servisu fundamentál sira-ne’e.
Notísia relevante: BTL arrekada reseita rihun $589 ba kofre Estadu
Jornalista: Arminda Fonseca
Editora: Maria Auxiliadora
