DILI, 13 Fevereiru 2025 (TATOLI)—Komandante Jerál Polísia Nasionál Timor-Leste (PNTL) Komisáriu Jerál Polísia, Henrique da Costa, hateten rekrutamentu membru PNTL iha tinan ne’e tenke ho transparénsia no akuntabilidade.
“Hakarak hateten rekrutamentu ida-ne’e tenke ho transparénsia no akuntável ba ema hotu hotu. Tanba ne’e, husu para ekipa traballu tantu husi Polísia Nasionál Timor-Leste ka husi interiór ka husi parseiru sira ne’ebé ita konvida mai atu fó asisténsia liuliu kolega sira hanesan Guarda Nasionál Republikanu, tenke halo ho transparénsia,” Henrique ba jornalista sira iha Sentru Formasaun Polísia (CFP-sigla portugés) Comoro, kinta ne’e.
Nia dehan, PNTL presiza iha duni rekrutamentu ba tinan ida-ne’e atu haforsa servisu instituisaun.
Hatán kona-ba rekizitu ba rekrutamentu, Henrique hateten, kritériu ba rekrutamentu husi Komandu Jerál PNTL submetidu ona bá Ministériu Interiór.
Notísia relevante: Aprova ona rezolusaun Governu ba rekrutamentu PNTL iha tinan ne’e
“Buat hotu ita-nia ekipa traballu aprezenta ona bá Ministériu Interiór. Husik Ministru Interiór mak haree kritériu sira ne’ebé mak komandu submetidu ona. Kuandu Ministériu Interiór haree ladi’ak, presiza atu hadi’a tan,” nia afirma.
Henrique hatutan bainhra kritériu sira-ne’e loos hotu ona mak Ministru Interiór foin fó-sai despaxu ministeriál, nune’e avansa bá rekrutamentu.
“Kuandu ita hadi’a hotu ona buat sira-ne’e, foin mak ita aprezenta filafali bá Ministru Interiór hasai diploma ministeriál ida ita bele implementa,” nia informa.
Rekorda fali katak liuhusi reuniaun ordináriu Konsellu Ministru, kuarta (5/2/2025), aprova ona rezolusaun governu ba rekrutamentu membru Polísia Nasionál Timor-Leste (PNTL) foun ba tinan 2025. Proposta ne’e aprezenta husi Ministru Interiór, Francisco da Costa Guterres.
Tuir planu, sei rekruta membru PNTL iha tinan ne’e hamutuk 500, iha-ne’ebé 400 sei tama iha Kursu Formasaun Ajente no 100 iha Kursu Forma Ofisiál.
Jornalista: Natalino Costa
Editór: Xisto Freitas da Piedade
