VIKEKE, 13 Fevereiru 2025 (TATOLI)—Komadante Polísia Nasionál Timor Leste (PNTL) munisípiu Vikeke, Superintendente António Rego Fernandes, relata inisiu Janeiru to’o Dezembru 2024, PNTL liuhusi unidade tránzitu konsege rekolla reseita hamutuk $11,364.00 ba kofre Estadu.
“Ita liuhusi unidade tránzitu rekolla koima husi Janeiru to’o Dezembru 2024, ita rekolla hamutuk $11,364 mak hatama kofre Estadu. Husi taxa ne’e, ita hasai fatura (invoice) 667 ba motorista sira-ne’ebé viola kódigu Estrada,” Komadante PNTL munisípiu Vikeke ne’e hateten ba jornalista sira iha nia kna’ar fatin, Base Camp, ohin.
Tuir nia, taxa sira-ne’e rekolla husi fonte mai husi transporte motorizada no karreta kompostu husi bus, angguna no kamioneta sira-ne’ebé baibain halo movimentu iha munisípiu Vikeke, ne’ebé viola regra kódigu estrada nian.
“Nune’e, ba tinan 2025, ami kontinua esforu halo sensiblizasaun ba ita-nia komunidade no hasa’e númeru patrollamentu iha kapitál Vikeke inklui postu sira ba prevensaun. Aleinde ne’e, ami mós sei aplika lai ho rigorozu ba komunidade ne’ebé viola regra Kódigu estrada dekretu-Lei nú. 6/2003 liuliu utilizasaun motorizada kanu resin no la uza kapasete. Ida-ne’e, ami sei aplika koima másimu,” nia dehan.
Tanba ne’e, nia dehan, tinan 2024 PNTL halo sensibilizasaun iha fatin barak, nune’e ba komunidade ne’ebé la kumpre regra kódigu Estrada mak polísia unidade tránzitu sei la tolera hodi selu koima ba Estadu.
“Iha tinan 2025 ne’e, ami sei kontinua tau atensaun ba utilizasaun transporte atu bele kumpre Kódigu estrada dekretu-lei nú. 6/2003 nian no mellora prevensaun númeru dezastre naturál,” bia hateten.
Enkuantu, tuir dadús membru PNTL munisípiu Vikeke totál hamutuk na’in-139 ne’ebé koloka ba postu lima inklui kapitál munisípiu Viqueque.
Jornalisra : Vitorino Lopes da Costa
Editór : Cancio Ximenes
