DILI, 13 fevereiru 2025 (TATOLI) –Reabilitasaun estrada iha munisípiu Manatutu seidauk finaliza tuir tempu no kontratu.
Ministru Obra Públika, Samuel Marçal, informa katak projetu reabilitasaun estrada husi Manatutu vila liga ba Postu administrativu Laklo, seidauk finaliza tuir kontratu tanba empreza nasionál mak kaer no mudansa kondisaun klima hanesan udan ne’ebé la fó tempu, nune’e difikulta empreza ezekuta serbisu lorloron no labele finaliza tuir tempu determinadu.
“Se ita kompara, ita-nia maluk nasionál sira klaru katak diferente iha kapitál, ekipamentu enjeñária; buat sira seluk. Ita hanoin, tanba ita atraza uituan, ita hapara hotu, nunka eduka ita-nia setór privadu nasionál sira, no ita la fó oportunidade. Maske ha’u hatene, sira atrazu duni maibé husi Ministériu Obras Publikas iha dever atu akompaña sira dudu neneik, atu kapasita sira, hanorin sira nune’e iha futuru ita bele hetan setór privadu di’ak kontribui dezenvolve nasaun nian,” Ministru Samuel Marçal hateten, hafoin partisipa reuniaun Konsellu-ministru, iha Palásiu Governu, kuarta ne’e.
Ministru MOP konsidera, projetu hotu fó ba empreza internasionál hotu sei hamate setór privadu nasionál maibé se sira ne’ebé timoroan sira seidauk bele, bele fó ba empreza internasionál. Sira ne’ebé timoroan, bele ita fó ba no akompaña sira.
Governante ne’e hateten, projetu estrada manatutu ba Laklo atraza, iha problema seluk mak kondisaun klima ne’ebé akontese; kuaze iha foho udan la fó fatin, nune’e empreza sira labele ezekuta servisu ho lais.
“Iha foho hanesan ita hatene udan-been agora maka’as, mudansa klimátika ne’ebé iha kuaze loron ida ema bele servisu oras rua, oras tolu de’it dalaruma mós loron tomak la servisu ne’ebé ita hotu haree hela situasaun klimátika ne’e, ne’ebé prontu ita hotu komprende,” nia afirma.
Hein tau alkatraun
Iha parte seluk, Prezidente autoridade munisípiu (PAM), Manatuto, Luís Inacio Henrique Henrique relata katak iha Manatutu, estrada liga ba postu administrativu balun di’ak ona enkuantu balun sei iha prosesu reabilitasaun hanesan estrada liga ba Soibada-Laclubar no Manatutu ba Laklo.
“Área infrastrutura, estrada iha postu sira hanesan Laleia, Natarbora, iha kondisaun di’ak maibé tenke halo nafatin manutensaun enkuantu Manatutu liga ba Postu Laklo, kontrusaun tinan rua ona hein de’it ona atu tau alkatraun tanba mós ho klima difikulta la’o neneik uituan, kuaze fulan rua ne’e udan la para no la fó biban ba sira atu halo serbisu maibé partisipasaun kompaña ho esforsu tomak kontinua halo,” nia akresenta.
Autoridade Munisípiu Manatutu ne’e hatutan, empreza ezekuta projetu sempre kolabora ho autoridade munisipál bainhira hasoru problema ruma iha terrenu no sempre tuur hamutuk hodi buka solusaun liliu liga ho komunidade sira.
Entretantu, Projetu reabilitasaun estrada ne’e lansa husi Primeiru-ministru Oitavu Governu konstitusionál, Taur Matan Ruak, iha loron 16 juñu 2023 ho distánsia kilómetru 13,672, ho totál orsamentu $6.507.608,11, ne’ebé sei ezekuta hosi empreza JOVA Construção Lda parseria ho PT. Wijaya Karya, ho durasaun serbisu projetu fulan-18 maibé ho problema sira ne’ebé empreza hasoru iha terrenu nune’e la konsege finaliza tuir tempu ne’ebé iha.
Tuir observasaun Jornalista TATOLI iha terrenu nota katak estrada hahú ona ho aterazen nune’e hein ona hodi tau alkatraun.
Jornalista: Anito Soares
Editór : Rafael Ximenes de A. Belo
