VIKEKE, 14 fevereiru 2025 (TATOLI)—Autoridade Vikeke liuhusi Sekretáriu Asuntu Organizasaun no Komunitáriu munisípiu Vikeke, Acacio de Sousa, husu autoridade suku sira iha munisípiu Vikeke uza motorizada tenke tuir neseaidade servisu suku nian ho responsabilidade.
“Ha’u hakarak husu ba xefe suku sira no funsionáriu suku uza motorizada labele uza atividade privadu no labele impresta ba ema seluk hodi uza ba atividade seluk. Motorizada ne’ebé Governu distribui ba xefe suku no funsionariu suku sira-ne’e uza ba nesesidade servisu suku nian ho reponsabilidade,” Acacio de Sousa, hateten ba jornalista sira, iha salaun munisipál Viqueque, ohin.
Nia hatutan, motorizada ne’e bandu xefe suku sira atu uza ba atividade negósiu no atividade sira seluk.
“Motorizada ne’e ita labele uza ba atividade negósiu no labele fó impresta ba ema seluk. Ba ita-nia xefe suku sira-ne’ebé lahatene lori motorizada, bele husu ajuda ba konsellu suku sira-ne’ebé hatene lori motorizada hodi tula xefe suku ba fatin enkontru ka bá aldeia, bandu ema seluk lori motórizada ne’e,” nia dehan.
Tuir karta sirkulár utilizasaun motorizada distribui ona ba xefe suku no funsionáriu suku sira, ne’ebé sé mak la kumpre regra ne’e mak Diresaun Jerál Dezentralizasaun no Governu Lokál (DJDGL) iha MAE sei koordena ho polísia tránzitu no Diresaun Jerál Patrimóniu Estadu sei foti asaun tuir regulamentu sira-ne’ebé iha.
Iha fatin hanesan, diretór asuntu organizasaun no komunitária, Cosme Sarmento, haktuir utilizasaun motorizada distribui karta sirkulár ba xefe no funsionáriu suku sira ho númeru referénsia 1/DJGL/MAE/2025 kona-ba apoiu motorizada ba xefe suku no funsionáriu suku sira.
“Ami distribui ona karta sirkulár rua ida ba xefe suku no ida seluk ba funsionáriu suku sira oinsá utilizasaun motorizada. Iha karta sirkulár ne’e uza motorizada ba atendementu komunitáriu no enkontru ofisiál, tenke iha karta kondusaun, labele uza ba partidaria no labele fó ba ema empresta, labele muda xafa matríkula no kór. Xefe suku seidauk bele lori motorizada bele husu ajuda membru konsellu suku sira, kumpre regra tránzitu, karik servisu monu iha sábadu no domingu tenke iha karta ofisiál ruma relasiona ho atividade,” nia hateten.
Iha biban ne’e, Xefe suku Uaimori, postu Vikeke Vila, munisípiu Vikeke, Francelino António Gomes, hateten simu ona karta sirkulár ne’ebé distribui husi Diresaun Organizasaun no komunitária ne’ebé autoridade sira kumpre regra sira-ne’ebé iha karta sirkulár laran.
“Ohin, ami simu karta sirkulár ne’ebé ami sei kumpre regra sira-ne’e. Karik ami uza la tuir sirkulár, ami sei halo justufikasaun ruma, inklui mós motorizada ba funsionáriu sira. Aami-nian, daudaun ne’e sekretáriu suku mak uza no la para iha sede suku Uaimori tanba laiha seguransa hodi tau matan ba motorizada ne’e. Karik iha sede suku iha seguransa ami bele para motorizada iha sede suku,” nia dehan.
Tuir dadus, motorizada ne’ebé koloka ba suku 36 hamutuk unidade 72 ba xefe marka Verza 36 no ba funsionáriu suku 36 ho marka Revo Fit.
Jornalista : Vitorino Lopes da Costa
Editór : Cancio Ximenes
