Embaixadór Indonézia-TATOLI, I.P diskute kooperasaun iha área kapasitasaun rekursu umanu
DILI, 14 Fevereiru 2025 (TATOLI)— Embaixadór Repúblika Indonézia iha Timor-Leste, Okto Dorinus Manik, sesta ne’e, vizita no hasoru malu ho Prezidente Ajénsia Norisioza TATOLI. I.P, Noémio Mateus Soares Falcão, hodi diskute kona-ba kooperasaun institusionál no kapasitasaun rekursu umanu liuliu formasaun iha área jornalizmu nian.
Iha vizita ne’e, Embaixadór Okto akompañadu husi Sekretáriu II Embaixada Asuntu Informasaun no Sosio-Kulturál Indonézia, Pandu Rahadyan Wicaksono, ne’ebé simu diretamente husi Prezidente TATOLI, I.P akompañadu husi Vise-Prezidente asuntu Administrasaun no Finansa, Madalena P. Carlos inklui Vise-Prezidente asuntu Mídia no Jornalizmu, Zezito da Silva.
Embaixadór Indonézia ne’e esplika, vizita ne’e hala’o tanba hakarak loke oportunidade ba kooperasaun entre Embaixada Repúblika Indonézia (KBRI) ho instituisaun sira iha Timor-Leste (TL).
“Ami mai iha ne’e, atu kolabora no servisu hamutuk. Enkontru ne’e, ami haree diretamente no hasoru malu ho maluk jornalista sira-ne’ebe iha ne’e. Ami mós koko saida mak ami bele halo hanesan kapasitasaun, kooperasaun institusionál ka saida de’it mak bele halo atu hasae maluk jornalista sira-nia kapasidade,” Embaixadór Okto hateten ba Agência TATOLI iha Faról.
Nia rekoñese papél jornalista nian iha progresu dezenvolvimentu nasaun hotu-hotu no husu jornalista sira tenke entuziasmu nafatin hodi servisu makaas ba Timor-Leste, tanba servisu jornalista nian la’ós de’it ho kakutak maibé mós fiziku atu nune’e bele buka notísia hodi fó informasaun ba públiku.
Tuir nia, dezafiu ida-ne’ebé jornalista sira hasoru iha era modernu ida-ne’e mak oinsá bele kombate notísia HOAX no TATOLI nu’udar instituisaun Estadu iha responsabilidade morál atu hato’o notísia ne’ebé loos ho loloos no rigor.
“Maibé, agora dezafiu mak oinsá ita atualiza velosidade notísia, nune’e kombate notísia HOAX atu nune’e TATOLI sai ajénsia ne’ebé ema hotu fiar. Ami-nia esperansa mak TATOLI karik tarde uitoan atu públika notísia, tanba tenke ho kuidadu maibé tenke fo sai notisia loos. Tanba, instituisaun nasaun sira iha responsabilidade morál no legál atu relata buat hotu ho loloos,” nia esplika.
Aleinde ne’e, Embaixadór Repúblika Indonézia mós hato’o nia votu parabéns ba membru foun Konsellu Diretivu TATOLI, I.P nian ne’ebé sei responsabiliza hodi lidera Ajénsia Notisioza TATOLI hanesan mídia estatál iha Timor-Leste.
Iha fatin hanesan, Prezidente Ajénsia TATOLI, I.P, Noémio Mateus Soares Falcão, hato’o agradesimentu ba Embaixadór Okto Dorinus Manik nia vizita ida-ne’e, no hein katak iha futuru Embaixada Indonézia ho TATOLI bele loke oportunidade ba kooperasaun liuliu ba dezenvolvimentu mídia.
“Ami husi TATOLI hakarak agradese ba. Embaixadór nia tempu mai vizita TATOLI. Ita hein katak kooperasaun ne’ebé iha ona to’o agora bele hadi’a liután. Ba oin, Embaixada Indonézia ho TATOLI bele loke oportunidade ba kolaborasaun iha dezenvolvimentu mídia no formasaun sira,” nia dehan.
Jornalista : Cidalia Fatima
Editór : Cancio Ximenes
