KOVALIMA, 14 fevereiru 2025 (TATOLI) – Komandante PNTL Munisípiu Kovalima, Superintendente Asistente, Inacio Amaral, halo inspesaun ba motorizada sira ne’ebé utiliza hosi Ofisiál Polísia (OPS), Suku 30 iha Kovalima.
“Komandu PNTL Kovalima halo inspesaun ba motorizada husi Ofisiál Polísia Suku (OPS) husi 30 ho intensaun atu atualiza kondisaun reál motorizada nune’e ita bele update (atualiza) kondisaun motorizada ne’ebé aat bele buka meiu fasilita servisu OPS iha suku”, Komandante PNTL Kovalima, Superintendente Asistente, Inacio Amaral hato’o ba jornalista sira, hafoin halo inspesaun motorizada, iha Komandu PNTL Kovalima, Santa Rosa, ohin.
OPS balun servisu iha suku remota, haree ba kondisaun estrada motorizada difisil atu la’o, ho maneira halo Inspesaun ba motorizada parte ida atu enkoraja servisu OPS sira.
“Motorizada ne’ebé nia kondisaun la di’ak atu ba suku no Aldeia ita orienta komandante eskuadra, karreta ne’ebé koloka ba eskuadra apoiu mós atividade OPS maske kondisaun motorizada no estrada la di’ak, maibé atividade OPS la’o nafatin. Ho kondisaun motorizada aat atividade OPS la la’o, ne’e labele ”, nia esplika.
Liuhusi inspesaun, autoridade polisiál ne’e dehan, komandu foin hatene kondisaun motorizada OPS aat oinsá mak bele fasilita ho meiu seluk halo patrullamentu ho karreta nune’e bele halo jestaun.
Tuir rezultadu inspesaun, iha OPS na’in lima nia kondisaun motorizada aat no daudaun ne’e hadi’a hela iha ofisina tanba sira uza motorizada durante tinan sia ona, maibé OPS sira nafatin uza hodi hala’o servisu. Loloos motorizada sira ne’e la merese ona sira atu uza.
Hafoin halo inpesaun hodi hatene kondisaun motorizada komandu mós prepara planu hodi submete ba komandu Jerál PNTL oinsá atu haree transporte ba OPS.
“Ita atualiza kondisaun motorizada OPS ita sempre submete relatóriu no Planu Asaun Anuál ( PAA) ita sempre hato’o presiza fó apoiu motorizada foun depende desizaun husi motorizada Ministériu no komandu Jerál”, nia rekomenda.
Tuir dadus, Kovalima iha nia OPS 30. Husi númeru ne’e, OPS na’in ida mak uza motorizada KLX, sira seluk uza motorizada marka honda verza entaun presiza atu fó apoiu motorizada 29 ba sira ne’ebé uza motorizada antiga.
Jornalista:Celestina Teles
Editór :Rafael Ximenes de A. Belo
