VIKEKE, 14 fevereiru 2025 (TATOLI)—Xefe suku Irabin de Baixo, postu Uatucarbau, munisípiu Vikeke, José Baptista do Carmo, informa iha Programa Nasionál Dezenvolvimentu Suku (PNDS) tinan 2024 nian ne’e, autoridade suku Irabin de Baixo deside hodi konstrui drainajen iha aldeia tolu (3) maibé daudaun ne’e sai paradu.
“Ami-nia konstrusaun drainajen paradu tanba orasamentu 2024 fila tiha ba kofre Estadu. Tan ne’e, agora labele kontinua servisu hodi finaliza obra fíziku ida-ne’e,” Xefe suku Irabin de Baixo ne’e hateten ba Tatoli, iha postu Uatucarbau, ohin.
Nia hateten, problema ne’e foin lalais nia parte aprezenta ona ba Prezidente Autoridade Munisípiu (PAM) Vikeke hodi haree preokupasaun sira-ne’e.
“Ami-nia problema ne’e, ha’u hato’o ba PAM ona. Kalan Komisaun Anti Korupsaun (CAC, sigla portugés) rona iha loron tersa (11/02) mai direta ami-nia suku hodi haree obra sira-ne’e,” nia dehan.
Drainajen ne’e konstrui iha aldeia tolu mak hanesan aldeia Makaki ne’e ninia konstrusaun fíziku atinje ona 100%, Taraira foin atinje 50% no aldeia Makausan foin atinje 25%, maibra obra projetu ne’e la kontinua tanba osan laiha ona.
“Ami-nia preokupasaun ne’e iha suku seluk PNDS fasilita foti tiha osan, maibé PNDS la fasilita ami hodi foti osan ba sustenta obra ne’ebé sei la’o hela. Ho razaun saida mak PNDS labele fasilita ami suku Irabin de Baixo. Tanba Orsamentu husi PNDS ba tinan 2024 preve ba Irabin de Baixo totál hamutuk $53,000.00 no husi orsamentu ne’e $48,000.00 fila ba kofre Estadu,” noa hateten.
Iha fatin seluk, Diretór PNDS munisípiu Vikeke, Francisco Soares Varela, rekoñese obra konstrusaun drainajen iha suku Irabin de Baixo paradu tanba oraamentu 2024 ne’e tau fali iha kofre Estadu.
“Kona-ba projetu drainajen ne’ebé la’o iha suku Irabin de Baixo paradu bazeia ba tijoru husi Ministériu Finansa katak orsamentu 2024 to’o 31 fulan-Dezembru tenke fila ba kofre Estadu. Ho rajaun sira-ne’e serbisu labele la’o. Maske matéria iha terrenu maibé orsamentu insentivu ba traballadór sira laiha,” nia hateten.
Nia fó hanoin ba autoridade suku Irabin de Baixo hato’o ba nivel nasionál hodi haree lai asuntu ne’e hodi fó solusaun, tanba projetu sei hala’o hela maibé orsamentu fila ona ba kofre Estadu.
Jornalista : Vitorino Lopes da Costa
Editór : Cancio Ximenes
