VIKEKE, 14 Fevereiru 2025 (TATOLI)—Ministériu Administrasaun Estatal (MAE) liuhusi Diresaun Jerál Dezentralizasaun no Governu Lokál (DJDGL), sesta ne’e, distribui ekipamentu komputadór marka HP ba autoridade suku 38 no postu lima hodi fó atendimentu no fasilita komunidade iha munisípiu Vikeke.
Reprezentante Diresaun Jerál Dezentralizasaun no Governu Lokál (DJDGL) husi MAE, Gaspar Hunu Gosmão, hateten utilizasaun ekipamentu komputadór ne’ebé Governu liuhusi MAE sosa hodi responde ba nesesidade suku nian no labele uza ba atividade privadu sira.
“Ha’u husu autoridade sira, rai ekipamentu sira-ne’e iha fatin di’ak no ekipamentu komputadór ne’e uza servisu suku nian liuliu prienxe demografia, monografia no halo atendementu ba ita-nia komunidade. Nune’e mós, ha’u husu ba autoridade suku no funsionáriu suku na’in-haat (4), atu uza ekipamentu sira-ne’e ho responsablidade,” Gaspar Hunu Gosmão hateten iha serimónia distribuisaun ekipamentu komputadór ba xefe suku sira iha salaun munisipál Vikeke, ohin.
Komputadór ne’e, nia dehan, labele tuu USB (Universal Serial Bus) husi li’ur tanba bele lori virus afeta ba dokumentu sira-ne’ebé rai iha komputadór nia laran, tan ne’e bandu autoridade no funsionáriu sira labele uza USB arbiru ba komputadór.
“Bainhira komputadór avaria ruma, autoridade suku tenke halo koordenasaun ho munisípiu mak buka solusaun ba manutensaun komputadór. Ita labele bolu ema tékniku ka IT husi li’ur mak ba hadi’a, ne’e labele,” nia dehan.
Ho ekipamentu ne’e, nia husu autoridade sira kuidadu hodi uza ba tempu naruk hodi bele halo atendementu ba komunidade iha suku ida-idak.
Iha fatin hanesan, Sekretáriu Asuntu Administrasaun no Finansa munisípiu Viqueque, José da Costa de Sousa, haktuir durante ne’e suku sira halerik ba fasilidade sira-ne’e, nune’e Governu fó apoia ona ekipamentu sira-ne’e hodi fasilita servisu loro-loron atu fó atendementu di’ak ba komunidade.
“Ha’u sente, durante ne’e ita-nia funsionáriu sira iha suku hakerik liu ba fasilidade, nune’e ita-nia Governu la taka matan, ajuda tán fasilidade sira ba suku hodi atende ita-nia komunidade. Ha’u husu agradese ba Governu liuhusi MAE ne’ebé apoia ekipamentu sira-ne’e ba ita-nia suku sira iha Vikeke,” nia hateten.
Iha biban ne’e, xefe suku Uaitame, postu Uatulari, munisípiu Viqueque, Marcelino Pinto Alves, hateten ho apoia ida-ne’e bele ajuda no fasilita ona autoridade suku no funsionáriu sira servisu loron-loron iha suku hodi atende komunidade.
“Ba apoiu komputadór ida-ne’e, ha’u sente ajuda no reforsa ami-nia serbisu hodi fó atendementu ba ita-nia komunidade iha suku. Ba apoia ida-ne’e, ami iha ona komputadór rua no mákína emprime ne’ebé iha sede suku,” nia dehan.
Diresaun Jerál Dezentralizasaun no Governu Lokál (DJDGL) husi MAE no sekretáriu munisípiu Vikeke, ofsialmente entrega direta ekipamentu komputadór ba kada xefe suku ida-idak iha Vikeke.
Kada suku ida husi suku 38 iha Vikeke ne’e, hetan ka simu komputadór unidade ida no suku foun rua (2) ne’e mak kada suku ida sei simu komputadór unidade rua (2) no postu administrativu lima (5) ne’e sei hetan komputadôr unidade ida.
Jornalista : Vitorino Lopes da Costa
Editór : Cancio Ximenes
