DILI, 14 Fevereiru 2025 (TATOLI)—Ministru Negósiu Estranjeiru no Kooperasaun (MNEK), Bendito dos Santos Freitas, hasoru malu ho Embaixadora Nova Zelándia iha Timor-Leste, Helen Tunnah, hodi ko’alia kona-ba programa bolsa estudu ba Timor-Leste.
Embaixadora Helen Tunnah informa, Governu Nova Zelándia sente haksolok tebes mak sei anúnsia atu aumenta númeru bolsa estudu signifikativu Manaaki Manaaki Nova Zelándia ba timoroan sira iha nível tersiáriu.
“Nova Zelándia kontente atu anúnsia aumentu númeru signifikativu Manaaki Nova Zelándia nia bolsa estudu nível tersiáriu. Ba iha admisaun tolu (3) tuir mai, ami sei aumentu númeru bolsa estudu husi bolsa 12 ba 32 kada tinan. Ida-ne’e sei hahú iha tinan akadémiku tuir mai. No, ida-ne’e notísia di’ak tebes,” Embaixadora Helen Tunnah, hateten ba jornalista sira.
Embaixadora Helen Tunnah hatutan, Ministru Negósiu Estranjeiru Nova Zelándia nian ne’ebé hala’o vizita ofisiál iha Timor-Leste iha fulan-Juñu 2023, deside ona atu haforsa amizade ne’ebé di’ak liután entre nasaun rua.
“Ida-ne’e nu’udar kompromisu forte ida husi Nova Zelándia ba dezenvolvimentu ekonómiku no umanu. Ida-ne’e mós refleta Nova Zelándia nia apoiu ba Timor-Leste, bainhira ita-boot sira buka atu adere ba ASEAN,” Diplomata ne’e hateten.
Tanba ne’e, liuhusi programa bolsa estudu ne’e, sei ajuda hametin liután prosperiedade, seguransa no kreximentu sustentável, tanba Governu Nova Zelándia mós permite atu haburas ligasaun entre povu ho povu.
Entretantu, Governu Nova Zelándia oferese bolsa estudu dahuluk ba Timor-Leste iha tinan 1990, no agora iha ona alumni hamutuk na’in-500 mak sai nu’udar benefisiáriu husi programa hotu-hotu Nova Zelándia nian.
Jornalista : Hortencio Sanchez
Editór : Cancio Ximenes
