BAUKAU, 14 Fevereiru 2025 (TATOLI)—Serbisu Munisipál Saúde (SMS) inísiu tinan ne’e rejista kazu dengue hamutuk 14 iha munisípiu Baukau.
Diretór Serbisu Munisipál Saúde Baukau, Cristiano Cipriano Belo, esplika husi númeru kazu referida akontese iha postu administrativu tolu hanesan Baukau Vila, Venilale no Vemasse ne’ebé konsideradu tinan ne’e redús bainhira kompara ho tinan 2024.
“Moras dengue iha Baukau husi inísiu janeiru to’o fevereiru tinan ne’e ita rejista pasiente hamutuk 14,” Diretór Serbisu Munisipál Saúde Baukau informa ba TATOLI iha ninia kna’ar fatin, Vila Antiga, Baukau, sesta ne’e.
Husi númeru afetadu ne’e, afeta ba postu Vemasse hamutuk na’in lima kompostu feto 2 no mane 3, postu Venilale 5 (mane) no postu Baukau Vila iha 4 kompostu mane 3 no feto 1.
Husi pasiente na’in 14 ne’e kategoria ba tipu rua kompostu moderadu na’in 1 ne’ebé afeta ba feto no krítiku hamutuk 13 kompostu mane 10 no feto na’in 3.
Cristiano Belo hateten Saúde Baukau kontinua halo prevensaun liuhusi fahe abate no fumigasaun ba uma komunidade ne’ebé identifikadu iha área risku ba moras dengue.
“Hafoin rejista, ita kontinua kedas halo prevensaun hanesan fumigasaun ba área afetadu sira ho distánsia metru 100,” nia haktuir.
Saida mak Dengue?
Moras dengue ne’e hada’et husi susuk Aedes Aegypti husi infetadu nia tata. Dengue la hada’et husi ema ba ema. Dengue hada’et bainhira intensidade tata ne’e aas ka maka’as liu.
Sinál no sintoma husi dengue
Dengue nia sinál no sintoma mak hanesan:
- Isin manas
- Ulun moras maka’as
- Moras iha matan fulun
- Mosu erupsaun iha kulit
Tratamentu ba moras dengue
Laiha tratamentu espesífika hodi hamate virus dengue iha ema-nia isin. Ba ema ne’ebé hetan infesaun no baixa iha fasilidade saúde, médiku sira hala’o de’it jestaun kazu ne’ebé di’ak. Jestaun kazu ida-ne’ebé bele hala’o liuhusi maneira tuirmai:
- Fo nutrisaun/elektrolit iha fasilidade saúde. Ez: fó soru-been, fó hemu bee no fó han ai-fuan vitamina barak.
- Médiku sira dala ruma fó mós ai-moruk hanesan parasetamol hodi rezolve isin manas ne’ebé mosu.
Jornalista: Natalino Belo
Editór: Xisto Freitas da Piedade
