DILI, 16 Fevereiru 2025 (TATOLI)—Taur Matan Ruak kontinua lidera Partidu Libertasaun Populár (PLP) ba períodu 2025-2029 liuhusi kongresu nasionál daruak ne’ebé hala’o durante loron rua, 15-16 Fevereiru 2025, iha Salaun Oka Rudal, Hudi-Laran, Dili.
Iha kongresu ne’e, pakote kandidatura hamutuk rua, maibé pakote sira-ne’e bainhira hetan verifikasaun husi komisaun verifikasaun podér, pakote ida mak tuir rekizitu no avansa bá eleisaun sekreta.
Kongresista sira ne’ebé rejistada hamutuk 1.206 maibé 927 mak tuir eleisaun. Iha eleisaun, kongresista hamutuk 755 vota afavór ka aseita ba pakote úniku, enkuantu votu la aseita iha haat no votu la vale 168.
Pakote ne’ebé eleitu iha kongresu kompostu husi Jenerál Taur Matan Ruak ba prezidente ho nia vise na’in ualu mak hanesan vise I Abrão Freitas, vise II Abel Pires, vise III Rosalina Ximenes, vise IV Daniel Santos do Carmo, vise V Signi Verdial, vise VI Osório Lequi, vise VII Amilcar Hatenu no vise VIII Melita Maria de Oliveira.
Notísia relevante: PLP hala’o kongresu nasionál ba daruak
Entretantu, ba Komisaun Polítika Nasionál nian prezidente mak Taur Maran Ruak, vise I Demétrio Amaral, vise II Merita Correia, vise III José António Belo, vise IV Júlio Loro Mesak, vise V Carceliano Oliveira, vise VI Abel da Conceição, vise VII Martinho Gusmão no vise VIII Florindo.
Ba Komisaun fiskalizasaun orsamentu nian mak Costantinho Brandão ba prezidente, vise I Silvester Esteme, vise II Franculino da Costa, vise III Rafael Mendes, vise IV Regina Freitas, vise V Augusta Amaral Lopes, vise VI Meta Mendonça, vise VII Verónica Moniz no Vise VIII Bernardo da Costa.
Ba Komisaun Jurisdisaun nian mak hanesan Tiago Amaral Sarmento ba prezidente, vise I Gabriel Aparício, vise II João Soares, vise III Roberto Dasi, vise IV Tomás Correia, vise V Miquela de Jesus, vise VI Nicolau Salvador Márques, vise VII Joana de Jesus Magno no vise VIII Raquela Godinho.
Iha biban ne’e, Prezidente Eleitu Partidu Libertasaun Populár, Taur Matan Ruak, hato’o agradesementu ba komisaun organizadora ne’ebé organiza kongresu nasionál PLP nian durante loron rua la’o ho di’ak.
“Durante loron rua ne’e ita hasa’e no alkansa medida importante iha kongresu ida-ne’e hanesan halo revizaun ba ita-nia estrutura hodi adapta ba realidade momentu ida-ne’e nian no ita aprova mós ita-nia programa sira inklui ita eleje lideransa foun sira atu tau-matan ba partidu tinan lima tuirmai,” Taur Matan Ruak hateten liuhusi nia diskursu iha salaun Oka, domingu ne’e.
Aleinde ne’e, Matan Ruak mós hato’o agradesementu ba kuadru no dirijente sesante sira ne’ebé tinan sia nia-laran fó sira-nia kontribuisaun maka’as ba PLP bele hala’o nia kna’ar tuir mandatu ne’ebé povu fó.
“Sira konsege ajuda lori Partidu Libertasaun Populár ba Parlamentu Nasionál no esforsu seluk mak ajuda lori halo parte governasaun ida iha tinan lima nia laran iha VIII Governu nian, maski iha difikuldade maibé ita ultrapasa no hakotu misaun tinan lima nia laran husik hela legadu ida-ne’ebé di’ak rezulta ohin sidadaun sira iha saudade ba ita-nia governasaun,” Taur dehan.
Taur hatutan katak ema hateten la’ós ida-ne’ebé forte mak bele moris, nein sira ne’ebé matenek liu, maibé sira ne’ebé moris durante tempu naruk, sira ne’ebé adapta aan ba realidade no mudansa sira ne’ebé konjuntura obriga.
“Ida-ne’e fó hanoin ba lidér sira ne’ebé lidera partidu ida-ne’e, prinsípiu no valór balun ne’ebé ita atu tuir mak umildade, hatene saida mak ita bele no hatene mós saida mak sira seluk kontribui atu ita bele harii ekipa ida forte hodi serbisu hamutuk, tanba ha’u la fiar ema ida mesak lori susesu ba prosesu ida nia laran, satán prosesu polítiku no sosiál, kulturál hanesan harii nasaun,” nia subliña.
Prezidente partidu ne’e solisita membru sira atu serbisu ho ekipa tuir nia dalan lori susesu, hanoin pozitivu, katak buka soluasaun ba problema sira, la’ós lori fali problema hodi hatodan konsiénsia no hatodan aan atu hakat filafali bá kotuk.
“Ita-nia objetivu ida de’it, haboot filafali prezensa Partidu Libertasaun Populár nian iha Parlamentu Nasionál no lori partidu sai fatór importante ida ba estabilidade governativa iha futuru. Tanba ne’e, ha’u husu serbisu todan ida-ne’e la’ós de’it ba sira ne’ebé eleitu maibé ba família boot partidu ida-ne’e tenke serbisu hamutuk,” ex Prezidente Repúblika ne’e rekomenda.
Jornalista: Arminda Fonseca
Editór: Xisto Freitas da Piedade
