DILI, 15 Fevereiru 2025 (TATOLI)—Partidu Libertasaun Populár (PLP) realiza kongresu nasionál ba daruak durante loron rua, 15-16 Fevereiru 2025, iha Salaun Oka Rudal, Hudi-Laran, Dili.
Kongresu ho tema ‘Mai Ita Hamutuk Salva Timor-Leste’ nia objetivu atu konsolida estrutura, militante no simpatizante partidu nian hahú husi nasionál to’o munisípiu, lansamentu kartaun partidu ba membru sira no re-estrutura estrutura partidu.
Prezidente PLP, Jenerál Taur Matan Ruak husu ba membru partidu sira atu metin nafatin iha partidu ka labele halai sees.
“Ohin imi haklalak ka hakilar, ha’u hakarak tinan lima mai ne’e imi eziste nafatin. Labele halai tanba ha’u hatene membru balun iha partidu laran halai sai,” nia enkoraja.
Tuir nia katak prosesu polítiku no sósiu kulturál iha mundu, papél partidu polítiku sira importante loos, tanba reprezenta sidadaun sira liuhusi eleisaun direta no indireta.
“Ita harii partidu hanoin aan de’it ka buat hotu ha’u mak hanoin, ida-ne’e ita sei sai problema. Nune’e, ita tenke konsolida ita-nia aan, loke odamatan ba ema sira ne’ebé mehi no hanoin hanesan ho ita no parseiru sira ne’ebé hanoin hanesan ho ita, mai ita hamutuk salva nasaun,” Taur esklarese.
Taur hatutan katak atu salva nasaun haree uluk salva nia ema, tanba dezenvolvimentu hotu iha nasaun nia laran ninia benefísiu ne’e ba nia ema ka povu, tanba nasaun avansada sira hanesan Sigapura no seluk tan maski sira-nia dezenvolvimentu boot to’o ne’ebé mós sira koloka nafatin importánsia ba nia povu.
“Maibé, ita-nia nasaun la’e. Lori dezenvolvimentu tenke duni populasaun tún-sa’e. Ha’u-nia pozisaun ba ida-ne’e dehan kruél no dezumanu. Ho ida-ne’e ita-nia nasaun iha situasaun ne’ebé difísil. Ita tenke duplika ita-nia esforsu sira hodi luta kontra injustisa sira, independentemente maihusi sé de’it ita tenke luta kontra injustisa,” Jenerál ne’e realsa.
Iha fatin hanesan, Prezidente FRETILIN, Francisco Guterres Lú Olo, ne’ebé partisipa iha kongresu referidu, hateten nia parte sente onradu tebes bele partisipa kongresu nasionál daruak PLP nian hodi partilla nia opiniaun ruma ba kongresista sira.
Nia esplika, pozisaun FRETILIN nian uluk kedas sempre fó mahon nafatin ba partidu sira seluk, maibé ba partidu sira seluk FRETILIN respeita nafatin, maibé hanoin katak to’o ona momentu ida atu partidu polítiku sira tenke fila-oin bá malu atu hamutuk hadi’a rai ida-ne’e.
“Apresia tebes ba liafuan murak ne’ebé sai tema ba kongresu ida-ne’e: ‘Mai Ita Hamutuk Salva Timor-Leste’. Liafuan ida-ne’e ha’u bele hateten reflesiva tebes. Ida-ne’e importante iha konjuntura polítika agora, katak partidu polítiku sira sé de’it hotu-hotu hanoin atubele la’o bá-oin,” Lú Olo informa.
Lú Olo solisita PLP no delegadu partidu nian tantu nasionál to’o munisípiu sira ne’ebé ohin partisipa iha kongresu ne’e idak-idak lori hanoin ka matéria mai tau hamutuk halo diskusaun ne’ebé di’ak iha kongresu nasionál hodi define postura bá-oin.
“Matenek no hanoin hotu ne’ebé imi iha, ida-ne’e mak sei serve duni lori imi ho pozisaun ne’ebé klaru no forte liután hanesan partidu hamriik hamutuk ho sira seluk salva Timor-Leste,” nia dehan.
Aleinde ne’e, Sekretáriu Jerál FRETILIN, Marí Alkatiri, hateten Timor-Leste agora tama iha konjuntura ida-ne’ebé komplikadu tebes.
“Halo reflesaun boot tebes ba situasaun agora. Dala-barak iha prosesu tomak haluha katak bainhira ita luta ita tau ita-nia vida hakuak kauza ida mak ita tama bá prosesu. Ita-nia eroi no mártir sira mate hakarak haburas rai ne’e, signifika uma vida, uma causa, uma jornada libertadora. Reflesaun ida-ne’e tempu ona atu ita hamoris filafali kauza sira-ne’e,” Marí haklaken.
Nia salienta katak atu salva duni Timor-Leste mak tenke hatudu diferensa katak bainhira ukun salva povu, labele diskrimina ema, labele iha fronteira polítika no labele impede fali entendimentu.
Iha fatin hanesan, Konselleiru Másimu Partidu Kmanek Haburas Unidade Nasionál Timoroan (KHUNTO), José dos Santos Bucar ‘Naimori’, kontente tebes partisipa iha kongresu ohin ne’e no nia husu FRETILIN no PLP hamutuk la’o bá-oin hadi’a povu nia moris.
“Ha’u lori partidu KHUNTO hato’o ami-nia parabéns ba estrutura tomak husi partidu PLP. Atu salva Timor-Leste mak ita hotu tenke tane aas povu nia interese. Partidu KHUNTO nu’udár jerasaun foun prontu nafatin hamutuk hadi’a povu nia moris,” Naimori hateten.
Iha biban ne’e, Naimori husu PLP no FRETILIN katak atu salva Timor-Leste tenke asegura malu nune’e ema seluk labele tama iha klaran, tanba polítika ne’e dinámika, katak ohin bele amigu, aban bele sai inimigu.
Tuir Artigu 19 husi Lei Partidu Polítiku Nú. 2/2016, loron 3 fulan-Fevereiru, hateten Kongresu ka Konferénsia partidu polítiku nian sei hala’o reuniaun regulár ho intervalu másimu tinan haat.
Jornalista: Arminda Fonseca
Editór: Xisto Freitas da Piedade
