Iwan Fals: “Xanana laran di’ak no konsege baku ha’u-nia kabaas”
DILI, 29 Maiu 2026 (TATOLI)—Komisaun organizadora festival TT TasiFest 2026, sesta ne’e, aprezenta arista internasionál hanesan Calema (Portugál), Iwan Fals (Indonézia) no Guy Sebastian (Austrália) ba Primeiru-Ministru, Kay Rala Xanana Gusmão, molok performa iha festivál TT TasiFest 2026, ne’ebé hala’o iha Tasi-Tolu iha 29-30 Maiu 2026.
Notísia Relevante:Keta haluha! Ohin, kantór lendáriu Iwan Fals sei harame Tasi-Tolu
Artista lendáriu Indonézia, Iwan Fals, hateten ohin loron hetan oportunidade hodi hasoru malu ho Primeiru-Ministru, tanba osida kalan nia sei hatudu performe iha festivál TT TasiFest no nia sei lori múzika hamutuk 17.
“Ha’u kontente tebes bele hasoru malu ho PM Xanana,ema ne’ebé laran di’ak no Xanana konsege baku ha’u nia kabaas,” Kantór Lendáriu Indonézia, Iwan Fals, hateten ba jornalista ho hamnasa ba jornalista sira iha Palásiu Governu, ohin.
Artista ne’e, prezensa iha Timor hanesan oportunidade dahuluk durante tinan 50, entaun bele selu ona ninia saudades durante ne’e atu mai vizita Timor-Leste.
“Ha’u mós kontente haree paisajen Timor nian liuliu ninia iha tasi ne’ebé furak, foho sira no sosiedade sira mesak ema laran di’ak,” nia fo apresiasaun.
Istória kona-ba kantór lendáriu Indonézia Iwan Fals
Iwan Fals nu’udar artista lendáriu iha Indonézia. Nia naran loos mak Virgiawan Listanto, moris iha Jakarta, Indonézia, iha loron 03 fulan-Setembru tinan 1961. Husi tempu ki’ik, nia hatudu ona talentu boot iha área múzika no gosta tebes kanta ho toka.
Iha tempu joven, Iwan Fals hahú nia karreira liuhusi kanta iha eventu ki’ik sira no festival múzika. Maske durante nia moris, nia hasoru difikuldade no desafiu barak, nia la para kontinua luta atu realiza nia mehi iha mundu múzika.
Múzika sira husi Iwan Fals ne’e barak ko’alia kona-ba moris ema ki’ik, injustisa sosial, pobreza no situasaun polítika. Tanba ne’e, nia sai artista ida-ne’ebé besik ho povu no hetan apoiu husi ema barak iha Indonézia no nasaun seluk.
Album no múzika balun husi kantór lendáriu Iwan Fals ne’ebé sai famozu iha Indonézia ne’e mak hanesan; Bento, Bongkar, Ibu no Yang Terlupakan.
Liuhusi ninia letra músika sira-ne’ebé kle’an no emosionál, Iwan Fals bele inspira joven sira atu hakmatek ba realidade sosiál no fó importánsia ba solidariedade entre ema ba ema no ema seluk.
To’o agora, artista lendáriu Iwan Fals sei konsidera nu’udar símbólu liberdade espresaun no reprezenta povu nia lian iha Indonézia. Nia kontribuisaun iha mundu múzika halo nia naran sei hela nafatin iha istória múzika Indonézia nian.
Iha biban ne’e mós, tuir arista Duo CALEMA hateten objetivu enkontru ho Primeiru-Ministru, hanesan onradu ida maske antes ne’e sira hasoru malu tiha ona iha tinan kotuk, entaun ida-ne’e hanesan sira-nia maneira atu fó koñesimentu.
“Entaun ami mai dala rua ona iha Timor-Leste, oportunidade ne’e ami labele husik liu, tanba ami mós iha saudasaun ba rai ida-ne’. Tanba ne’e agradese ba TT TasiFest,” Duo Calema ne’e dehan.
Aleinde ne’e, nia hatutan katak sira-nia preparasaun ba loron aban nian mak oinsá organiza didi’ak sira-nia ajenda atu bele performa ho di’ak, maske la fasíl.
“Maibé ami sente kontente tebes, tanba ami hakarak mantein ligasaun ida-ne’e ho di’ak liután ba future,” nia hateten.
Notísia Relevante: Calema hakarak aprende no hakerek múzika iha dalen Tetun
Jornalista : Alexandra da Costa
Editór : Cancio Ximenes
