Keta haluha! Ohin, kantór lendáriu Iwan Fals sei harame Tasi-Tolu

DILI, 29 Maiu 2026 (TATOLI)—Hori tinan naruk, kantór lendáriu Indonézia Iwan Fals hakuak mehi hakarak tebes atu bele vizita Timor-Leste, maibé mehi ne’e nunka sai realidade. Hori tempu ba tempu, iha fulan-Maiu (2026) nia rohan, mehi ne’e lori artista lendáriu Iwan Fals bele sama ain iha rai Timor-Leste.

Notísia Relevante: MJDAK-TasiFest diskute dezenvolvimentu juventude no kultura

Artista Lendáriu Iwan Fals husi Indonézia sente kontente bele partisipa iha Festival TT TasiFest 2026 ne’ebé mak organiza husi Event2 iha Tasi-Tolu durante loron rua, hahú husi 29 to’o 30 Maiu 2026 iha Tasi-Tolu, no kontente haree mós Timor-Leste nia paisajen ne’ebé furak tebes.

Iwan Fals hateten, bainhira nia ho ninia ekipa simu konvite atu partisipa iha Festival TT TasiFest 2026 iha Tasi-Tolu, Dili, nia sente kontente tebes.

Tanba, nia dehan, durante nia karreira iha mundu múzika ne’e nia hakarak tebes atu performa iha Timor-Leste maibé lahetan oportunidade. Maibé, nia hateten, iha tinan ida-ne’e bainhira simu konvite husi TasiFest faze datoluk (III) ne’e, nia laran sente kontente tebes.

“Ha’u-nia karreira iha múzika iha tinan 1975, ha’u hakarak mai Dili maibé laiha oportunidade. Agora ha’u mai Timor, ha’u sente sente laloran tasi mesak furak loos. Tanba ne’e, husu ba timoroan sira atu kuidadu imi-nia tasi tanba imi-nia tasi furak tebes. Ha’u sente kontente bele mai iha Dili hodi haree paisajen ida-ne’ebé mak furak demais,” Kantór Lendáriu Indonézia, Iwan Fals, hataten ba jornalista sira liuhusi konferénsia Imprénsa ne’ebé hala’o iha Hotel Timor, kinta (28 Maiu 2026) ne’e.

Nia sente kontente tanba nia rasik rona direta husi populasaun sira iha Dili, ne’ebé durante ne’e rona direta múzika ne’ebé nia hakerek no nia rasik hananu.

“Ha’u sente kontente no ha’u hakarak haree no rona populasaun Dili ne’ebé mak akompaña ha’u-nia múzika ne’e oinsá. Tanba, ha’u hatene, ita-boot sira bele kontente ho múzika ne’ebé mak ami sei perfoma iha Tasi-tolu,” nia dehan.

Istória kantór lendáriu Indonézia Iwan Fals

Iwan Fals nu’udar artista lendáriu iha Indonézia. Nia naran loos mak Virgiawan Listanto, moris iha Jakarta, Indonézia, iha loron 03 fulan-Setembru tinan 1961. Husi tempu ki’ik, nia hatudu ona talentu boot iha área múzika no gosta tebes kanta ho toka.

Iha tempu joven, Iwan Fals hahú nia karreira liuhusi kanta iha eventu ki’ik sira no festival múzika. Maske durante nia moris, nia hasoru difikuldade no desafiu barak, nia la para kontinua luta atu realiza nia mehi iha mundu múzika.

Múzika sira husi Iwan Fals ne’e barak ko’alia kona-ba moris ema ki’ik, injustisa sosial, pobreza no situasaun polítika. Tanba ne’e, nia sai artista ida-ne’ebé besik ho povu no hetan apoiu husi ema barak iha Indonézia no nasaun seluk.

Album no múzika balun husi kantór lendáriu Iwan Fals ne’ebé sai famozu iha Indonézia ne’e mak hanesan; Bento, Bongkar, Ibu no Yang Terlupakan.

Liuhusi ninia letra músika sira-ne’ebé kle’an no emosionál, Iwan Fals bele inspira joven sira atu hakmatek ba realidade sosiál no fó importánsia ba solidariedade entre ema ba ema no ema seluk.

To’o agora, artista lendáriu Iwan Fals sei konsidera nu’udar símbólu liberdade espresaun no reprezenta povu nia lian iha Indonézia. Nia kontribuisaun iha mundu múzika halo nia naran sei hela nafatin iha istória múzika Indonézia nian.

Jornalista : Felicidade Ximenes

Editór        : Cancio Ximenes