DÍLI, 29 Maiu 2026 (TATOLI) – Ekipa konjunta kompostu husi Sekretaria Estadu Asuntu Toponímia no Organizasaun Urbana (SEATOU), Ministériu Obras Públikas (MOP), Diresaun Nasionál Transportes Terrestres (DNTT), Bee Timor-Leste (BTL) no Polísia Nasionál Timor-Leste (PNTL), iha sexta-feira ne’e ofisialmente hahú servisu alargamentu estrada nasionál diresaun Terminal Becora to’o Fatuahi, munisípiu Díli.
Sekretáriu Estadu Asuntu Toponímia no Organizasaun Urbana, Germano Brites, hateten katak servisu ne’e tama ona ba faze implementasaun depoisde prosesu administrativu sira remata iha fulan hirak liubá.
“Agradese ba komunidade sira ne’ebé koopera ho di’ak tebes durante semana hirak liubá, liuliu sira ne’ebé fó ona espasu hodi fasilita projetu ida-ne’e. Ohin ekipa konjunta ho ekipamentu no makina hahú ona halo demolisaun ba parede sira ne’ebé sei impede alargamentu estrada,” dehan Germano Brites ba jornalista sira iha Terminal Becora.
Nia esplika katak estrada husi Terminal Becora to’o Fatuahi klasifika hanesan estrada nasionál, tanba ne’e presiza halo alargamentu atu responde ba nesesidade movimentasaun transporte ne’ebé aumenta ba beibeik.
“Antes ne’e, largura estrada metru 6 de’it. Agora Governu halo alargamentu to’o metru 14, inklui ho área ba parajem no fasilidade seluk,” nia hateten.
Durante implementasaun projetu ne’e, transporte públiku no privadu husi munisípiu Lautém, Viqueque, Baucau no Manatuto sei la bele liu temporariamente iha área Fatuahi. Veíkulu sira sei para iha Hera-Akanunu durante servisu alargamentu ne’e lao hela. Depoisde projetu remata, mak transporte sira sei retoma sirkulasaun normal entre Díli no munisípiu sira ne’e.
Antes ne’e, SEATOU no MOP halo ona levantamentu no verifikasaun dadus ba uma-kain hamutuk besik 200 ne’ebé afetadu husi projetu ne’e.
Governu agora sei hein kontinua ho prosesu pagamentu kompensasaun ba família sira ne’ebé envolve.
Jornalista: Camilio de Sousa
Editór: Filomeno Martins
