DILI, 17 Fevereiru 2025 (TATOLI)—Konsellu Imprensa (CI-sigla portugés) hamutuk ho Programa Nasaun Unidu ba Dezenvolvimetu (UNDP-sigla inglés) fasilita formasaun Media Debate Training on Democracy ba jornalista na’in 30 ba etapa dahuluk. Hafoin ne’e, ba etapa daruak, sei oferese tan ba ema na’in 30.
Objetivu husi formasaun ne’e atu eleva koñesimentu jornalista sira atu adapta ba situasaun ohin loron nian molok halo publikasaun ba notísia sira. Formasaun hala’o durante semana ida, 17-21 Fevereiru 2025.
Prezidente Konsellu Imprensa, Otélio Ote hateten Konsellu Imprensa servisu hamutuk ho UNDP fasilita formasaun referida foku ba televizivu ne’ebé envolve husi jornalista RTTL,EP no jornalista sira seluk.
“Formasaun ida-ne’e ita envolve jornalista RTTL mak barak tanba RTTL mak fó-sai notísia barak liu. Tanba ne’e, ho formasaun ida-ne’e, oinsá sira atu hadi’a mekanizmu iha debate televizivu sira ho di’ak,” Otelio hateten iha nia intervensaun bainhira partisipa formasaun referida ne’ebé hala’o iha Salaun João Paulo II, Komoro, segunda ne’e.
Nia husu ba governu nafatin suporta kompozisaun membru Konsellu Imprensa foun atu kontinua apoia formasaun ba jornalista sira.
Iha fatin hanesan, jestór ba programa UNDP, Muhamed Jaffar, hateten mídia training ne’e atu kapasita jornalista sira hodi ninian papél iha kestaun demokrasia no boa governasaun.
“Espera formasaun ida-ne’e bele fó benefísiu ne’ebé di’ak ba formadu sira. Tanba ne’e, husu ba formandu sira atu aproveita formasaun ne’e,” nia afirma.
Aleinde ne’e, Sekretáriu Estadu Komunikasaun Sosiál, Expedito Loro Dias Ximenes informa katak formasaun ida-ne’e importante tebes ba jornalista sira no jestór mídia konvensionál sira oinsá atu eleva koñesimentu téknika no kapasidade profisionál.
“Ha’u sente katak formasaun ne’ebé Konsellu Imprensa halo ne’e importante tanba ita hotu hatene katak avansu teknolojia ida-ne’e jornalista sira mós presiza atualiza sira-nia performánsia,” nia tenik.
Nia dehan, governu komprometidu kontinua apoia Konsellu Imprensa iha área formasaun no área sira seluk ne’ebé relevante ho mídia.
Jornalista: Natalino Costa
Editór: Xisto Freitas da Piedade
