DILI, 17 Fevereiru 2025 (TATOLI)—Deputadu Bankada Governu husi Congresso Nacional da Reconstrução Timorense (CNRT), José Virgílio, rekomenda ba Ministériu Ensinu Superiór Siénsia no Kultura (MESSK) atu tau atensaun ba estudante sira-nia dormitóriu.
“Hakarak foti asuntu povu nian, liuliu ita-nia joven sira. Ba MESSK bainhira iha Orsamentu Jerál Estadu (OJE) mai tau iha planu oinsá ba estudante universidade sira-nia hela fatin. Hanesan horisehik ha’u bá iha Hera haree joven sira hela iha kos, iha kuartu ida joven na’in-hitu ka ualu hela hamutuk,” Deputadu levanta kestaun ne’e liuhusi reuniaun plenária Parlamentu Nasionál (PN), segunda ne’e.
Nia dehan, ezekutivu sira bainhira halo elaborasaun orsamentu tenke konsidera estudante sira-nia preokupasaun hodi bele hasai kualidade ensinu.
Notísia relevante : UNTL orsamenta rihun $899 ba projetu laboratóriu Fakuldade Ezata iha Hera
Deputadu husu ba Komisaun G ne’ebé trata asuntu Edukasaun, Juventude no Desportu atu labele halo fiskalizasaun de’it ba ministériu no universidade sira de’it maibé presiza tun direta hodi halo fiskalizasaun ba estudante sira-nia hela fatin.
Iha sorin seluk, Deputadu Bankada Governu husi Partidu Demokrátiku (PD), Armando Lopes, hateten, presiza haree fatin ka dormitóriu ba estudante sira iha Hera no iha territóriu tomak.
“Dormitóriu ba estudante hanesan parte ida atu hasa’e kualidade ensinu ba estudante, foku no estudu komfortável,” Prezidente Komisaun G tenik.
Vise-Ministru ba Asuntu Parlamentár, Adérito Hugo da Costa, rejista preokupasaun sira no sei enkamiña ba ministériu tutela hodi tau atensaun.
Jornalista : Nelson de Sousa
Editora : Julia Chatarina
