KOVALIMA, 17 fevereiru 2025 (TATOLI) – Diretora Servisu Edukasaun Munisípiu Kovalima Elda de Fatima fó hanoin ba dirijente Eskola sira labele kobra osan husi inan-aman atu suku uniforme ba alunu sira.
Dirijente ne’e dehan, kona-ba uniforme eskola ba alunu sira, kuidadu kobra osan husi inan-aman sira tanba relasiona ho akontesimentu iha munisípiu balun no Ministra Edukasaun kestiona, ho razaun kobra osan boot husi inan-aman.
“Ha’u nia hanoin husik ba nune’e ba 2025 ne’e alunu sira uza uniforme eskola anteriór tanba iha tempu-badak ema sei fa’an uniforme eskola iha loja no merkadu sira”, Elda de Fatima, fó hanoin bainhira hala’o enkontru ho dirijente eskola, iha Santa Rosa, ohin.
Ho nune’e nia dehan, ba dirijente eskola la presiza atu kobra osan atu suku uniforme ba alunu kada eskola atu dirijente sira labele foti risku.
“Ita foti risku bainhira kobre osan aas liuhusi inan-aman ita sala tanba ne’e lalika preokupa ba uniforme eskola ba ulunu sira atu uza, kór uniforme Pré-eskolár la dook husi roupa ne’ebé fa’an iha loja, hanesan kór matak, mutin no kór seluk tan fa’an iha merkadu iha,” nia dehan.
Manorin-na’in ne’ebé kobra osan husi inan-aman sei prosesu halo investigasaun, se di’ak liu foti desizaun hamutuk ho inan-aman husi alunu sira. Di’ak liu manorin sira foku hala’o prosesu aprendizajen, oinsá alunu sira iha kualidade no kontrola profesór sira hanorin alunu sira iha estabelesimentu ensinu sira.
Nia esplika tan katak, edukasaun la prepara uniforme ba alunu kada eskola maibé prepara de’it kór uniforme kada eskola; hahú pré-eskolár to’o ensinu tékniku vokasionál.
Iha sorin seluk, Diretór EBC Foho Bua Bento Nascimento reforsa, uniforme ba alunu sira inan-aman rasik mak sosa maibé sei hein no atu labele kobra osan husi inan-aman.
“Ohin diretora fó hanoin ba ami labele kobra osan husi inan-aman atu suku uniforme ba alunu sira, relasiona iha munisípiu balun akontese osan ne’ebé eskola kobra devolve fali ba inan-aman,”nia haktuir.
Jornalista:Celestina Teles
Editór :Rafael Ximenes de A Belo
